(AP) — E fugitivo No. 1 di Italia, un hefe di Mafia condena pa yuda planea algun di e asesinatonan mas horibel di e pais, a keda aresta ayera na ora el a busca tratamento na un clinica priva na Sicilia despues di tres decada como profugo.
Matteo Messina Denaro a wordo husga in absentia y condena pa decenas di asesinato, incluyendo pa yuda planea, hunto cu otro hefenan di Cosa Nostra, un par di bom na 1992 cu a mata fiscalnan top anti-Mafia – y a hiba estado Italiano pa reforsa su accion contra e sindicato di crimen Siciliano. E ta enfrenta varios sentencia di bida largo cu ta spera e ta bay cumpli na un prison di seguridad maximo y bao condicionnan particularmente restrictivo reserva pa hefenan top di crimen organisa.
El a bay scondi un aña despues di e bomnan tempo ainda e tabata jong – pero e tabata considera como un di e hefenan top di Cosa Nostra hasta como fugitivo. Centenares di polis a keda encarga durante añanan pa busk’e, e ultimo di tres hefenan top di Mafia pa temponan largo kende a logra evadi captura durante decadanan. Awo e tin 60 aña di edad, y su condicion di salud a yuda investigadornan hay’e, segun general di Carabinieri, Pasquale Angelosanto, kende ta lidera e team di operacionnan special di cuerpo policial Italiano.
Autoridadnan no a bisa pakico e tabata ricibiendo tratamento, pero a captur’e na clinica La Maddalena na Palermo, un facilidad medico afluente cu reputacion pa trata pashent di cancer, y medionan Italiano a bisa cu e tin un aña ta ricibi tratamento.
Durante un conferencia di prensa, autoridadnan a bisa cu tratamento di Messina Denaro por continua na e hospital di prison.
E aresto dialuna a yega 30 aña y un dia despues di e captura dia 15 di januari 1993 di “capo dei capi”, Salvatore ‘Toto’ Riina na un apartamento na Palermo, kende tabatin 23 aña como fugitivo. Mesina Denaro a sconde durante berano di e aña aki.
