Dialuna 10 di januari Heintje Ras a completa su hazaña di 100 dia den e mina di fosfaat na Sero Colorado. Ayera diabierna 14 di januari durante un conferencia di prensa Heintje a elabora ariba su experiencia durante e 100 dianan den e mina.

Despues di un preparacion psicologico di mas o menos un aña largo, e dia a yega pa Heintje drenta e mina di fosfaat. E ta conta cu el a drenta cu hopi entusiasmo, decidido di su mes cu e ta bay pa un meta y na caminda, el a conta, el a encontra hopi retonan chikito, mediano y grandi cu e mester a enfrenta. “Retonan cu awe mi ta bisa Dios danki cu mi a pasa tur di nan, retonan cu mi no tabata prepara pa nan”, el a bisa.

Algun ehempel cu el a duna di e retonan aki, algun chikito, tabata cu el slip cay y afecta su brasa drechi, dede di pia a kibra, el a sufri un malestar di stoma, entre otro.

El a sigui conta cu e dianan a cuminsa cana y el a cuminsa yega na memey di e hazaña, dia number 50 y el a bisa cu pa e punto ey ainda e tabata sinti su mes sigur. Pero di dia number 50, el a splica, cierto cosnan a cuminsa den e mina te na e punto cu practicamente e tabatin gana di give up, gana di entrega pa motibo di varios cos.

“E calor tabata un factor hopi importante ariba mi curpa, e stof, e sushi ey bou un grawatamento, e incomodidad y e ora mi a bisa nos ta bay te final pasobra pa 100 dia mi a bin pa 100 dia mi ta bay. Nos a yega 70 dia, ora mi a kibra e Guinness World Record, practicamente mi tabata cla pa sali pasobra mi a kibra e record mundial. Pero mi a bolbe bisa no, mi a bin pa 100 dia nos ta wanta te 100 dia. Mi mente keto bay a wanta duro y nos ta a bay pa 100”, el a conta.

Ariba dia 70, Heintje su ekipo a organisa un radiothon pa recauda fondo y e ta bisa cu esey tabata e dia di mas grandi cu den su curason e tabata anhela pa yega pasobra su pensamento ta cu un radiothon nacional ta hopi grandi. Pero ora cu e dia a yega, e resultado di e radiothon no tabata “cos di gaba”.

“Asina nos a keda bay cu un poco decepcion, un poco defrauda. Nos a bay pa 75 dia, drenta 80 dia, mas desesperacion y mas gana di sali mi tabatin y practicamente mi tabata cla pa entrega shete biaha di e 70 dianan ey”, el a agrega.

Heintje ta indica cu den e 70 dianan ey cosnan hopi mahos, hopi straño y cosnan bunita tambe a pasa hunto, y asina el a keda wanta y bringa y el a yega dia number 80. “Un alegria a drenta mi curason pasobra nos ta yegando final di aña y mi tabata contento pasobra nos tabata den ultimo 20 dianan”, el a bisa.

Pero e ultimo dianan no tabata manera el a spera. El a conta cu den e ultimo 20 dianan a pasa e cosnan mas mahos cu e por a experiencia den subida cu nunca e lo kier ripiti mas.

Heintje a pasa Pasco y aña nobo den e mina, un paso y aña cu e ta describi simplemente como diferente pe y pa su yiunan principalmente. Despues di cambio di aña, faltando solamente 10 dia pa completa e mega hazaña, el a conta cu el a kere cu ultimo 10 dianan lo ta bay ta facil, pero a resulta cu e ultimo 10 dianan tabata e pio dianan cu el a pasa den e mina, Heintje a expresa. “Asina nos por bisa nos a yega na e final di 100 dia cu diferente contratiempo, diferente pensamentonan mixto, pero danki na Papa Dios nos a yega 100 dia”, el a bisa.

Durante e conferencia di prensa Heintje no por a keda sin gradici tur persona cu a yud’e, tur persona cu a contribui na su causa di un of otro manera.

“Mi ta bisa danki na e Arubiano humilde, danki na e no Arubiano, danki na e turista, danki na tur cu a tuma nan tempo di considera y balora e hazaña aki door di tuma nan tempo y curashi pa nan sali for di cualkier skina di Aruba y yega na e punta di Aruba, miho conoci como Sero Colorado y duna e granito di aprecio, apoyo y contribucion pa e realización di e soño pa Aruba. Danki na tur cu a contribui di nan curason”, Heintje a expresa.

Pero Heintje, aunke feliz di a logra su meta di 100 dia, a señala cu el a riesgo su bida, den sentido cu e mina ta cayendo abou poco poco pero sigur, pasobra e no a haya e apoyo ni ayudo necesario pa yega na su mega museo for di e personanan cu si por a yudele.

“El a bay asina pasobra nos mesun hendenan tabata kier pa e bay asina. Nos ta manera cu nos ta pasobra Arubiano ta come Arubiano y p’esey mi a wordo comi manera cu nan kier a comemi. P’esey mi no a haya ayudo, p’esey mi no a haya apoyo, p’esey mi a tuma e decision di bay ariba mi mesun forsa, ariba mi mesun deseonan y p’esey el a bay di e forma ey”, el a indica.

Algun dia pasa, ariba rednan social tabata circula, cu TeleAruba a graba na momento cu nan a haci un entrevista cu Heintje den e mina, unda cu por a mira un figura berde of bisti na berde ta sali den e video. Hopi a bisa cu e tabata un figura paranormal.

Ariba e video aki Heintje a indica cu e video a revela un cos cu nan tabata deal cune caba, tin biaha mas duro cu otro. Pero no kier a bay den mucho mas detaye ariba cualkier otro sucesonan paranormal cu por a pasa of no durante su estadia den e mina.

Pa loke ta trata e suma cu a logra recauda, Heintje ta bisa cu lastimamente no a logra recauda locual cu el a spera. “Mi tin cu bisa cu dolor na mi curason cu e placa no ta un suma cu mi por haci casi nada cune, pero e suma cu a wordo recauda, e meta tras di e 100 dianan ey no a duna e fruto cu ami a spera of manera cu Aruba a spera. E idea ta pa cumpra un tereno of un luga bandona, sikiera mas grandi cu mi cas, pero e placa no ta yega ni pa tereno ni pa un edificio. E suma total ta 21.322,95 florin”.

El a informa cu e donacionnan no a caba, e donacion lo sigui habri te cu 31 di januari. Y despues di esey, e suma total cu nan logra recauda na final di luna, nan lo dialoga pa wak kico lo por haci cu e suma ey.

Pa loke ta trata su salud, Heintje ta conta: “Mi ta kere cu mi salud no ta completamente bon. Eybou mi a inhala e stof 100 dia largo, un stof cu ta hopi fastioso cu ta grawata. Mi tabata bebe hopi vitamina pa mi curpa. Tur dia mi tabatin vitamina pa wowo. Pa loke ta comemento, nunca mi tabata falta cuminda, semper mi a come cuminda bon, cuminda saludabel, danki na Mariniers Kazerne pa esey. Mi a drenta 77 kilo y mi a sali 77 kilo”.

Tin cierto efectonan cu Heintje ta bringando cune aworaki cu el sali. Por ehempel e friu di airco, su curpa no ta soportando e friu di airco pa motibo di e calor extremo cu tabatin den e mina. Y su rutina di complemento, ainda ta menos cos y e ta comiendo cuminda militar ainda.

“Mi tin cuater dia benta na cama, e curpa ta un tiki zwak ainda pero awe ta e miho dia desde cu mi a sali, mi ta sinti mi miho awe y cu un tiki mas animo”, el a agrega.

LEAVE A REPLY

Please enter your comment!
Please enter your name here