“Gobierno apenas a ricibi e conseho, y awor ta studiando e.” Asina Minister di Finanzas Xiomara Maduro a reacciona na Bon Dia Aruba pa medio di su vocero, riba e conseho cu Raad van Advies a caba di manda.
Ta trata un conseho riba un condicion adicional di Hulanda pa Aruba por ricibi sosten di likides y desviacion di e saldo di financiamento, basa riba articulo 23 di e Landsverordening Aruba financieel toezich.
Articulo 23 di e LAft ta papia di circunstancianan special bao cua por desvia di e normanan presupuestario palabra cu Hulanda. E articulo awor ta bisa cu si ta necesario den caso cu mester fondo pa recuperacion di daño ocasiona pa incidentenan inusual manera calamidad natural, Minister, cu aprobacion di Conseho di Minister, Parlamento y despues cu acordacion di Gobierno di Reino, por dicidi pa desvia di e normanan, manera ta e intencion di articulo 14 di e LAft.
Articulo 14 di LAft ta bisa cu rtikel 14, College Aruba financieel toezicht, CAft ta evalua presupuesto y datonan di Ministerionan y otro parti di e sector colectivo. Den e articulo a delinea cuanto deficit a permiti te cu 2017. Entrante 2018 Presupuesto di Aruba lo mester a registra surplus. Manera ta conoci, CAft a conseha Gobierno di Reino pa permiti pa Aruba desvia di e normanan aki pa motibo di e pandemia, pero den e ultimo intercambionan por a nota cu e colegio ta hopi critico pa e maneho financiero di Aruba y entre otro pa e motibo ey, Gobierno di Hulanda a wanta cu e decision pa duna sosten di likides.
Evaluacion manera ta describi den inciso 1, CAft mester haya acceso na e presupuesto y presupuesto multianual unda ta inclui tur gasto y entrada, incluso e risiconan financiero cu tin pa construccionnan financiero cu no ta cay den presupuesto. Pero e ley tambe ta bisa cu mester duna informacion amplio di e gasto y entrada y cu esakinan mester sosode den e aña cu a haci e compromisonan, a lo menos cu for di e punto di bista di maneho administrativo e no ta na su luga. E presupuesto mester ta di tal manera hinca den otro cu e ta cumpli cu criteria di orden y cu por haci’e controlabel.
E articulo tambe ta bisa cu mester haya un bista riba e situacion financiero di e sector colectivo.
Situacion special
Den caso di emergencia unda no por warda acordacion di Gobierno di Reino, e Minister por haci compromisonan cu no ta mara na e presupuesto cu aprobacion di Conseho di Minister, Parlamento y cu Presidente di e Consehonan di Ministernan di Reino. Si no tin contacto posibel cu e ultimo, por desvia di e presupuesto pa tuma e medidanan necesario cu aprobacion di Conseho di Minister.
No a specifica cua ta e condicion nobo cu Hulanda a mara na sosten di likides. Na December, tanto Prome Minister Evelyn Wever Croes como Minister di Finanzas Xiomara Maduro a bisa cu Hulanda kier un protocol nobo riba normanan presupuestario sin cu tin un fecha di fin y esaki ta inaceptabel. A cataloga e ponencia aki di Gobierno di Hulanda como un condicion nobo.
Pero riba pregunta encuanto e conseho di Raad van Advies, mr. Maduro a bisa cu ta studiando e conseho. “Mester duna Gobierno espacio pa haci su trabao prome cu bin henter un discusion den prensa. Ora cu ta cla cu e trabao, tur hende por mira e conseho,” tabata e comentario di Minister Xiomara Maduro.
