Ayera 10 di januari 2022 Heintje Ras a sali for di e mina di fosfaat na Sero Colorado despues cu el a pasa 100 dia eyden y a logra kibra e Guinnes World Record.
Heintje a cuminsa cu e mega hazaña dia 2 di october 2021, dia cu el a drenta oficialmente den e mina di fosfaat, hunto cu su dos yiunan, Alzachary y Alzachayla Ras cu a compañe e prome dies diana di e hazaña.
E meta principal di e mega hazaña tabata pa recauda fondo pa construi un mega museo di antiguedad pa Aruba. Heintje a cuminsa cu un museo chikito na su cas y despues di varios aña a acumula hopi tesoronan historico cu no tin espacio mas na su residencia y su soño ta pa construi un mega museo pa Aruba y Caribe unda cu e por exhibi tur e artefactonan historico cu el a recolecta.
Un otro meta cu Heintje tabatin pa e hazaña aki ta pa pone Aruba su nomber resona na nivel internacional. Dia 11 di december Heintje a kibra oficialmente e Guinness World Record despues di a pasa 70 dia den e mina di fosfaat. Ayera na momento cu el a sali for di e mina el a pone oficialmente un Guinness World Record nobo di 100 dia.
Minister di Husticia y Asuntonan Social, Sr. Rocco Tjon, tambe tabat’ey presente na e salida oficial di Heintje y a felicita Heintje cu su logro.”Mi ta kere bo ta un ehempel pa hopi”, Minister a bisa. “E perseverancia, dedicacion y disciplina cu bo a mustra awe ta algo cu nos tur mester aplaudi. Y local ta mas importante pa mi ta cu bo a logra uni Aruba”.
Minister Tjon den nomber di Gobierno di Aruba a haci entrega di un plakaat na Sr. Heintje Ras pa su logro.
Diabierna 14 di januari Heintje lo duna un conferencia di prensa unda cu el lo conta di su experiencia di e hazaña di 100 dia den e minsa di fosfaat.
