(AP) — Hermentnan tecnologico manera appnan di contact tracing digital y inteligencia artificial cu gobiernonan Europeo a lansa pa combati Covid-19 no a logra tin un rol clave den resolve e pandemia y awo ta menasa di haci e monitoreo aki ampliamente acepta, segun un reporte nobo ta demostra.
E tecnologianan di vigilancia di salud cu cantidad di pais Europeo a lansa despues di inicio di pandemia di Covid aña pasa hopi biaha a keda adopta sin suficiente transparencia, salvaguardia of un debate democratico, segun un reporte publica ayera di AlgorithmWatch, un grupo di investigacion sin fin di lucro cu ta track e impacto di sistemanan di inteligencia artificial (AI pa su siglanan na Ingles).
Autoridadnan a core desaroya tecnologianan nobo of usa esnan existente pa combati transmision di e virus. Nan a construi appnan di contact tracing digital pa track rond di ken e hendenan infecta tabata, y despues a desaroya paspoort di vacuna pa verifica cu hende a ricibi e vacuna di Covid-19 pa asina biaha of drenta concierto, restaurant y otro negoshi. Algun a usa drone y aparatonan pa forsa cumplimento di reglanan di distancia social.
Mayoria di e sistemanan aki ta usa tecnologia di ‘toma di decision automatisa’, loke ta reduci e retonan social compleho presenta pa Covid-19 na un set di problemanan tecnologico den necesidad di solucionnan tecnologico, e organisacion basa na Berlin a bisa.
AlgorithmWatch a reconoce cu tecnologia a hunga un rol den yuda salba algun bida durante pandemia, mediante uso di inteligencia artificial pa eficientemente distribui vacuna. Pero autornan di e reporte ta bisa cu e tendencia mas preocupante ta con a usa e pandemia pa ‘consolida y normalisa mas ainda e vigilancia, monitoreo, midimento y prediccion di un cantidad aumentando di actividadnan diario – awo esencialmente incluyendo propositonan di salud publico y personal’.
Esey ta un problema mas grandi ainda considerando e ‘bugs, falsificacion, leak di data’ cu e grupo ta bisa ta presente den e hermentanan en cuestion, y e cantidad aumentando di uso pa informacion di tecnologia pa combati Covid rond mundo.
Entre recomendacionnan di e grupo: usa un maneho ‘basa riba evidencia’ na momento di lansa tecnologia di toma di decision automatisa, y claramente limita su uso pa evita ‘lansamentonan masivo scur’ cu ta malo pa democracia.
E reporte a documenta e ‘false starts’ y caidanan cu a bin cu core lansa tecnologia nobo y sin test, enfocando principalmente riba paisnan Europeo.
Den e prome dianan di un lockdown inicial na 2020, polis Belga tabatin plan pa usa drone pa monitor distancia social, pero a elimina e idea despues di ricibi critica. Tambe tabatin un movida pa usa camaranan di seguridad originalmente instala pa combati crimen serio y terorismo den un ehemplo di ‘function creep’ – unda ta usa tecnologia pa un proposito diferente cu su intencion original. Esey a trece cune riesgo expandi di un ‘sociedad di vigilancia’, segun e reporte.
Appnan di contact tracing a florece. Mayoria ta basa riba tecnologia desaroya conhuntamente entre Apple y Google, y ta usa señalnan di Bluetooth pa anonimamente registra cualkier smartphone cu tabata den contacto cercano, extendi, cu un celular perteneciendo na un persona cu a test positivo.
Pero adopcion no tabata uniforme. Por ehemplo, tin evidencia cu e app di tracing di gobierno di Cyprus ‘no a keda adopta ampliamente’, segun e reporte.
E app di status di vacunacion di gobierno Hulandes, CoronaCheck, tabata plaga cu erornan. Pa motibo di e diseño descentralisa y sensitivo pa privacidad, su codigo QR code no por a keda revoca si un usuario test positivo, permitiendo acceso continuo na lugarnan cu tabata rekeri prueba di vacunacion of resultado di test negativo. Tambe tabata posible pa manipula e app pa haya un resultado di test falso, segun e reporte.
Ministerio di Salud Hulandes no a responde inmediatamente na un email pidiendo comentario.
Un robot di chat Estoniano usa riba un cantidad di website publico a duna informacion incorecto tocante Covid-19. Den un instancia na october, a reporta cu no tabatin vacuna disponible contra e virus.
Gobierno Polaco a desaroya un algoritmo pa verifica e residencia di impuesto di empresarionan pa nan por cualifica pa asistencia financiero di pandemia, pero a ricibi critica pa no revela detayenan di e algoritmo cu por a ser usa pa evalua su efectividad.
