HIAS Aruba y Fundacion Telefon pa Hubentud Aruba a anuncia colaboracion di e proyecto “I Stopped It”. Un proyecto dedica na reduci riesgo di violencia y promove masculinidad saludabel na scolnan primario. Brian Verschuur, gender based violence officer na HIAS y Kimberly de Cuba, trahado social na Fundacion Telefon pa Hubentud a elabora ariba e proyecto aki y kico e obhetivo di esaki ta.

HIAS Aruba y Fundacion Telefon pa Hubentud Aruba a anuncia durante un conferencia di prensa cu nan a uni forsa pa reduci e riesgo di violencia contra hende muhe y hende homber, y pa promove masculinidad saludabel na scolnan primario na Aruba.

Verschuur a splica cu e colaboracion aki ta basa ariba e experiencia extenso cu Fundacion Telefon pa Hubentud Aruba tin den implementa proyectonan similar na scolnan primario na, Aruba, manera por ehemplo e programa di “Prevencion di Termento na Scol” (Stop Termento).

Fondonan pa e realisacion di e proyecto aki ta proporciona a traves di Bureau of Population, Refugees, and Migration (BPRM).

Verschuur a sigui splica cu HIAS y Telefon pa Hubentud a desaroya e proyecto piloto “I Stopped It” (Ami a par’e) y ta un proyecto preventivo di naturaleza. “I Stopped It” ta trata di para violencia entre mucha homber y mucha muhe. E proyecto ta atende cu e problema di violencia, e trato entre mucha homber y mucha muhe, igualdad, y ta promove masculinidad positivo den ocho scol primario di ocho districto na Aruba. .

 

Kimberly de Cuba, trahado social na Fundacion Telefon pa Hubentud a splica cu e proyecto a cuminsa oficialmente den luna di februari. Te cu aworaki seis di e ocho scolnan primario a ricibi e proyecto aki.

Segun de Cuba a conta, e reaccion preliminario di e proyecto ta mustra di ta hopi positivo cu studiantenan demostrando un comprension amplio riba e tematico. De Cuba a menciona cu un studiante a remarca: “Comunidad ta bisa cu hende muhe mester obedece, momento cu nan no ta haci esaki, hende homber tin e tendencia di usa violencia.”

El a agrega cu docentenan tambe ta haya e proyecto aki uno hopi beneficioso. El a indica cu un docente a menciona: “Esaki ta un bon iniciativa, mi ta kere cu e studiantenan por beneficia masha hopi di e tipo di proyectonan aki”.

De Cuba a remarca cu nan tin speransa cu mas scol lo tin e opinion aki di e proyecto. “I Stopped It” ta stimula prevencion di violencia, cu ta un di e puntonan importante di e ‘Beleidsvoornemens’ di Minister di Husticia y Asuntonan Social.

Adicionalmente, el a splica, Fundacion Telefon pa Hubentud Aruba ta recolectando data ariba e efectividad di e proyecto, pa asina determina si esaki ta presenta suficiente resultado satisfactorio pa asina por sigui cu e proyecto na otro scolnan na Aruba.

“Nos ta masha agradecido na tur persona cu a y ta tumando parti den e proyecto importante aki y spera cu via di “I Stopped It” nos lo por logra tin un impacto positivo den e bida di nos hobennan. Asina aki e hobennan por biba ariba un Aruba mas inclusivo y cu menos violencia,” de Cuba a resalta.

Creacion y implementacion di e proyecto “I Stopped It” ta den cuadro cu e ‘kenniscentrum’ di Fundacion Telefon pa Hubentud Aruba. Despues di 24 aña di existencia Fundacion Telefon pa Hubentud Aruba como un ‘kenniscentrum’ ta compartiendo y exportando conocemento cu organisacionnan gubernamental y no-gubernamental local y den region.

De Cuba a specifica cu e proyecto “I Stopped It” no ta enfoca riba muchanan stranhero solamente, e ta pa tur mucha di tur nacionalidad. El a remarca cu na Aruba, constantemente den noticia ta bin dilanti e parti di violencia cu ta tuma luga y pa motibo di esaki hopi mucha ta crese den un ambiente asina.

“Nos kier pa e muchanan compronde cu e ambiente aki no ta normal y no ta aceptabel. Pa medio di e proyecto aki nos ta bay na tur mucha na e scolnan basico y mustra nan kico ta e forma corecto y di cual forma nos kier nan conducta ta,” el a subraya.

El a agrega cu e meta di e proyecto “I Stopped It” ta pa cambia e conducta di e parti di violencia cu muchanan ta mira den hogar y den noticia, pa asina nan por sa cual ta e forma corecto cu nan conducta mester ta.

“I Stopped It” ta yuda combati tur tipo di violencia, pero un tipo di violencia specifico cu de Cuba a menciona cu no ta papia hopi di dje pero cu e muchanan ta reconoce di biaha, ta discriminacion. El a splica cu na momento cu nan a puntra e muchanan kico nan ta reconoce como discriminacion, e muchanan na tur scol cu nan a bishita te aworaki ta bisa e mesun frase, ‘bay back bo pais’.

Cu e proyecto aki ambos organisacion kier enfatisa pa e muchanan na Aruba no lanta cu un violencia contra di un stranhero y tampoco cu e muchanan stranhero ta pensa cu e ta algo normal cu nan mester biba cune na Aruba. “Nos kier mustra nan e forma corecto con pa anda cu nan,” de Cuba a bisa.

Pa loke ta e parti di masculinidad saludabel, Verschuur a splica cu e aspecto aki ta papia mas di e trato cu hende homber tin cu hende muhe y vice versa. Loke “I Stopped It” ta purba di haci, el a sigui indica, ta trece na luz con hopi biaha hende no ta pone atencion na con ta trata otro, papia cu otro y bay om cu otro en general. Masculinidad saludabel ta trece dilanti ehempelnan positivo con pa trata hende homber y hende muhe.

“E trece un poco di e tema ey dilanti basa riba e teoria di masculinidad positivo, bay om cu otro mas saludabel di un manera menos violento. Lamentablemente, estadisticamente, e cifranan ta mas halto di un banda pa otro den termino di violencia, dus nos ta purba ataca esey di un manera mas adecua pa e muchanan uzando esey como base,” el a señala.