26Mei, JO, Gradua1 (Shana).jpg

Bon Dia a haya e oportunidad pa sinta cu Shana Lace Kroon, kende ta un otro hoben Arubiano cu a caba di gradua den exterior. Shana ta splica Bon Dia cu tuma un decision pa bay studia den exterior no ta uno facil, sinembargo e no ta un meta imposibel pa logra.

Despues di a caba Mon Plasir MAVO den aña 2008, Shana a bay New York na unda el a cuminsa studia na Rockland Community College pa un ‘Associates Degree’  den accounting. Despues di esaki e la regresa Aruba pa haci un stage pa 3 luna na Atlas. Despues di e periodo aki e la bay Pace University pa termina cu su estudio di 5 aña cu un Bachelors den Accounting.

”Mi mama tabata un Accounting Manager y ami tabata sinta banda di dje tur dia mientras mi ta wak e ta haci Quickbooks. Mi semper tabata bon cu matematica y despues di un rato mi a realisa cu esaki ta locual mi kier haci” , Shana ta bisa.

Como Arubiano, Shana ta splica cu su experiencia studiando na Merca a habri su wowo nan masha hopi mes. ”Esaki ta definitivamente un cultura diferente, mi a mira con hopi en berdad bo por logra hasta si bo ta bin for di un caminda cu no tin mesun hopi oportunidad pa ofrece”.

No ta importa for di unda bo ta, abo tambe por logra

Shana ta conta Bon Dia cu djis paso bo a nace un otro caminda, no kemen cu bo no por bay y haci locual cu en berdad bo kier y persigui bo soñonan.  Na un banda, e tabata un poco mas facil pa Shana pa motibo cu su mama ta residente di Merca pues e tabata tin un cas y famia caminda e por a keda pa sosten mientras e ta studiando y trahando.

”Si no ta pa e apoyo di mi amigonan y mi famia, 100% sigur, mi no lo ta akinan awe mes. E motivacion di keda pusha mi y bisa mi: ”Djis caba cu e cos ki pa caba!” . E motivacion a yuda mi hopi pa mi no perde curashi y awo porfin mi a keda cla” , Shana ta splica.

El a haya un oferta caba di trabao na Stanford Connecticut, cual ta 45 min leu for di unda e ta biba na Rockland County, despues cu el a stage pa 4 luna e aña aki eynan. E oferta di trabao ta pa e cuminsa traha otro aña 2017.
 

Conseho pa otro studiante cu ta bay studia afo

”Na comienso e tabata hopi dificil pasobra tabata tin un barera di idioma, mi nunca a haya les completamente den Ingles. Despues di a custumbra cu un sistema Hulandes, e tabata un tiki straño na inicio pa haya les na Ingles, pero despues di tempo cos a cuminsa bay mas suave” , Shana ta splica.

Shana ta bisa cu na su scol e la topa cu diferente tipo di hende cu ta bin di tur parti di mundo y e la sinti den e sentido ey manera un scol na Aruba, pero cu un sistema Mericano. Shana su conseho ta pa purba di lesa mas buki cu bo por pa bo cuminsa custumbra cu e idioma y tambe pa busca mas informacion cu ta posibel riba e cultura y manera di biba pa bo familiarisa bo mes cu e luga cu bo kier bay studia. E ta un proceso pa siña mas di e cultura, e manera di biba y move en general. Segun e ta conta Bon Dia, no bay spera cu di un dia pa otro tur cos ta bay cuminsa bay suave, manera tur otro cos, e ta tuma su tempo pa bo adapta totalmente.

Shana su mayornan ta hopi orguyoso di dje. Su mama, Deborah Kroon, a nace y biba na New York te cu aña 1988 , unda el a muda bay Aruba y conoce Eddie Kroon, e tata di Shana. El a biba na Aruba pa 21 aña y a muda bay bek New York den 2008 pa Shana por bay studia.

”Ora cu Shana a haci su 18 aña, nos a realisa cu e no por a keda na Aruba sin un bon educacion. E oportunidadnan ta obviamente limita na Aruba sin un educacion halto, pues nos a dicidi cu bayendo Merca tabata e miho opcion pa motibo cu Shana mes no kier a bay Hulanda. Mi ta aplaudi Shana pa bin te aki pa haya un educacion pasobra e no ta facil mes, y el a bay hopi mas miho di locual mi a spera” , Deborah Kroon ta conta Bon Dia.

Duda semper lo tin, pero curashi nunca mester falta

Na comienso, Deborah ta splica Bon Dia, Shana a tabata tin poco duda si en berdad esaki ta locual e kier haci y e ta bisa cu nunca e la obliga Shana pa bay scol pero semper ora cu un periodo preta a presenta su mes, e tabata haci su best pa purba di yega na un solucion pa sinembargo sigui purba pa Shana caba e scol cu ayudo di e scol y gobierno.

”Mi no a logra di yega asina leu cu mi educacion, pues mi a purba di dune curashi pe sikiera intenta di caba e scol y sigui pusha. Pa mi, bida a  bay den mi caminda, mi a casa, mi a haya yiu, y mi no por a caba mi educacion y esaki a causa cu mi no por a yega mucho leu den mi carera. Mi realmente no tabata kier pa e pasa cu Shana pues mi a yud’ e mas cu mi tabata por pa e caba y awo e tin un futuro hopi bunita su dilanti”