Un hoben Guatemalteco di 19 aña di edad, na estado, a fayece e siman aki di lesion cu el a sufri na momento cu el a cay purbando di subi muraya di frontera Mericano cerca di El Paso, Texas, segun autoridadnan Guatemalteco y Mericano a bisa ayera.
Guatemala a identifica e muhe como Mirian Stephany Giron Luna. Personal medico a purba di scapa su baby, pero no tabata exitoso, segun ambos gobierno. Merca a bisa cu Giron tabata ocho luna na estado, mientras autoridadnan Guatemalteco a bisa e tabatin shete luna.
Aduana y Proteccion di Frontera Mericano CBP a culpa morto di Giron riba traficadonan humano, kende a curash’e pa purba di subi e muraya. Den un declaracion, Gloria Chavez, director di control di frontera pa sector El Paso, a bisa cu autoridadnan lo traha cu Mexico ‘pa haya esunnan responsabel pa pone e bidanan aki den peliger’.
Acting Commissioner di CBP, Mark Morgan a bisa reporteronan traficadonan a hiba Giron y su partner na e frontera y a laga nan ey den scuridad. Nan tabata intentando pa subi na momento cu el a cay. Agentenan di Patruya di Frontera a yega na dje y a yama autoridadnan medico, kende a hib’e hospital, pero ‘tragicamente, e mama y e mucha a fayece di nan herida for di e caida’, el a bisa.
Segun autoridadnan Guatemalteco, Giron a cay mas di 6m diasabra. Su partner, ken ta kere cu ta tata di e baby, eventualmente a haya agentenan di Patruya di Frontera, kende a yama ambulance.
Giron a sufri sangramento celebral, fractura di heup, y lesion di higra y riñon. Guatemala ta bisa cu ‘intervencion di cirugia’ no a logra scapa su bida y el a fayece ayera tardi.
Merca ya a construi of reemplasa alrededor di 220km di barera di frontera cu Mexico, otorgando varios contract pa mas construccion. Mayoria di e frontera na y alrededor di El Paso, dilanti di Ciudad Juarez, Mexico, ya tin algun forma di heki.
Giron ta di departamento Guatemalteco di San Marcos, cerca di frontera Mexicano. CBP ta bisa cu no tin record cu el a purba drenta Merca na un entrada oficial, ni cu a pon’e den programa ‘Keda na Mexico’, den cual decenas di miles di migrante ta ser forsa pa cana nan caso di inmigracion for di Mexico.
Su partner ta permanece den custodio di Patruya di Frontera, segun oficialnan.
