Temporada di carnaval a cuminsa y FADA conhuntamente cu Telefon Pa Hubentud (TpH), Departamento di Salubridad Publico, Wit Gele Kruis (WGK) y Duana a inicia nan carrousel di informacion pa nos muchanan di scol e siman aki. E biaha aki Duana a bira un partner nobo di e proyecto aki cu ta busca duna informacion y conscientisa nos muchanan y hobennan riba consumo di alcohol y droga.

FADA tin cuater aña consecutivo realisando e proyecto aki, y e fundacion aki ta hopi contento con e ta bayendo mirando e reaccion cu nan ta bin hayando. Ta asina cu prome cu scol cera na december ultimo, nan schedule tabata practicamente full caba. Ainda tin scol interesa y nan ta evaluando hunto cu e otro instancianan con nan por logra atende cu nan den e temporada chikito di carnaval 64.

TpH
Fundacion Telefon Pa Hubentud a expresa su satisfaccion di por traha hunto cu otro instancia pa percura cu nos muchanan y hobennan por bay den e direccion bon. Shurman Milliard di TpH a bisa cu pa varios aña caba nan ta participa den e carrousel di informacion y conscientisacion cu FADA ta organisa den temporada di carnaval.

Cada aña TpH ta purba di bin cu un topico cu ta hopi cerca di nos hobennan ya cu tur dia nan ta papia cu nos hobennan pa medio di nan yamadanan. Tur aña nan ta haya entre 2 mil pa 3 mil yamada y den e temporada di carnaval, pero tambe den Pasco y aña nobo nan ta ripara cu e cantidad di yamada cu nan ta ricibi ta aumenta.

E biaha aki TpH a dicidi pa bay riba e topico ‘cyber world’ durante e carrousel di informacion di FADA , kiermen tur cos cu tin di haber cu multimedia, internet, Facebook, Instagram, etc… Den e temporada aki nan ta wak un trafico hopi grandi riba social media, cosnan positivo pero tambe negativo, segun sr. Milliand.

Nan ta ripara cu riba e topico aki nos hobennan tin preguntanan ya cu nan ta interesa pa sa mas di dje. P’esey nan a traha un charla tocante riba cyber world caminda nan ta bay papia con multi media tabata den pasado y con e ta awor. Pero tambe con e lo por bira den futuro. E mensahe cu nan kier trece cerca nos hobennan ta cu nos ta e multi media, ya cu nos ta esun cu ta crea y bin riba internet riba locual nos kier. “Si nos ta hacie di un manera positivo e por ta un instrumento hopi bon,” el a bisa.

Igualmente nan ta haya hopi preguntanan di nos muchanan y hobennan tocante alcohol cu nan ta canalisa hunto cu FADA. Pero tambe nan ta duna tur informacion y tambe laga sa cual otro fundacion na Aruba por duna nan mas informacion adecuado y actual. Sexualidad tambe ta otro di e preguntanan cu nan ta bin hayando pa medio di nan telefon.

FADA y Duana
Rulienne Arends di FADA a bisa cu e carrousel ta specialmente pa scolnan secundario. E concepto aki di carrousel kiermen cu e scolnan tin oportunidad riba un dia pa haya tur e instancianan hunto den diferente local, caminda durante 45 minuut nan ta haya informacion di cada un instancia menciona ariba. Nan tin topiconan specifico caminda e studiantenan ta haya oportunidad pa haci pregunta y aclaria cualkier informacion cu nan a scucha diferente.

PR di Duana a bisa cu nan rol hunto cu e otro instancianan ta specialmente conscientisa nos muchanan y hobennan vooral na momento cu nan ta bay biaha y ta acepta paketenan sospechoso. Pa varios aña caba nan ta bin haciendo esaki caba den varios scol pa alerta riba e peliger cu nan por core ora cu nan ta acepta pakete cu nan no sa kico tin aden.

Nan ta haci demostracion te hasta cu nan team di cacho anti droga y nan ta ripara cu e muchanan ta birando mas consciente. Sinembargo nan ta ripara cu nan no ta wak e consecuencia cu un acto asina por trece pa nan y pa nan famia. P’esey den e carrousel di informacion aki duana ta bay enfoca riba e parti aki, kiermen con e muchanan ta wordo gaña pa transporta pakete cu droga.

WGK
Monique Giel-Labad di WGK a bisa cu nan rol den e carrousel aki ta pa pone nos muchanan mas consciente ariba actonan iresponsabel y kico ta su consecuencianan.

Nan ta bay haci uzo di material visual ya cu nan ta ripara cu esaki ta un forma efectivo cu e muchanan por compronde miho y mas lihe. Den nan presentacion WGK ta bay haci uzo di video pa nan mira kico ta e consecuencianan cu mas ta bin dilanti ora cu bo ta bou influencia. E parti di alcohol ta FADA ta bay atende cu ne y e parti di malesa transmiti sexualmente ta e seccion di Malesa Contagioso ta bay atende cu nan. Pero WGK ta bay mustra kico nan ta wak den practica y como un mucha ta yega asina leu ora cu e ta haya un malesa transmiti sexualmente con esaki ta pasa.

Sra. Giel-Labad a bisa cu tambe e ta bay haci uzo di su popchinan pa ilustra asina cu ora bo ta bou di influencia pa ehempel di alcohol cu un baby por nace cu e alcohol syndrome baby y kico esaki ta ocasiona y kico lo bira e futuro di e baby. Tambe e efecto di consumo droga ora cu un baby ta nace, etc… Igualmente kico por pasa cu e cerebro di e baby ora cu nan ta maltrata pa efecto di e droga.

E topico cu WGK ta bay trata e aña aki ta: Acto iresponsabel y su consecuencianan. Nan no ta bay trata profundo e parti di malesa transmiti sexualmente, pero si e consecuencianan cu temporada di carnaval a trece cerca nos muchanan y hobennan. El a bisa cu aña pasa e asunto cu mas a resalta tabata e parti di ‘lover boy’ y uzo di marihuana su consecuencianan pa e baby.

Igualmente nan kier habri nan wowonan riba si nan ta bou di influencia di alcohol y droga kico ta e consecuencia. E ta haya cu bo por duna e muchanan aki tur informacion, pero unabes cu bo ta bou di influencia, tur informacion ta wordo lubida. “Bo no ta mira y bo no ta haya pa ehempel den un caso di un malesa, bo no ta haya ni e holo”, el a bisa.