Pa fin di aña tur banco lo tin servicio pa paga impuesto online

Aruba Bank ta e prome banco cu a keda cla cu e rekisitonan pa locual ta sistema nobo di pago online pa Departamento di Impuesto. Esaki a keda lansa oficialmente y anuncia ayera por medio di Departamento di Impuesto kende ta expresa di ta sumamente contento cu e logro aki.

Departamento di impuesto ta spera cu pa fin di aña lo por tin tur e banconan ofreciendo e servicio di paga impuesto online. Directora di Departamento di Impuesto Luenne Gomez-Pieters ta bisa cu e departamento ta colaborando pa varios luna caba cu tur e cinco banconan na Aruba pa mehora servicio na cliente, y mehora pagonan di cliente via sistema online. Ayera cu hopi sentimento di alegria y satisfaccion manera sra. Gomez-Pieters a expresa, a informa cu Aruba Bank ta e prome banco cu a keda cla cu e rekisitonan pa locual ta pago via un sistema online anto a lansa esaki ayera.

Semper e cliente por a haci uzo di pago online, solamente e parti cu e cliente tabata mira tabata un caminda cu nan por a yena nan descripcion di pago, y tambe e suma cu nan ta paga sin duna otro informacion adicional tocante e pago. “Esaki nos a bin ta remarca na tur cinco banco na Aruba, caminda pa e banco y pa nos cu tin cu procesa e pagonan, lo duna un alivio tremendo pa asina duna un miho servicio na e clientenan cu ta paga,” sra. Gomez-Pieters a bisa. Banco cu Departamento di Impuesto a sinta na mesa y despues a yega na diferente gruponan di trabao, y delinea conhuntamente cu Aruba Bank riba kico ta bira e rekisitonan y con lo kier mira esaki den futuro. Riba e sistema lansa ayera, clientenan ta haya un lista di tur impuestonan cu por paga via sistema online di banco, lo por pone un persoonsnummer, e suma cu ta wordo paga caminda cu un tiki mas specifico e cliente por haci un transferencia di pago via e sistema online.

“Esaki ta algo tambe cu nos ta bin reconoce door cu clientenan a duna nos feedback den cuminsamento di aña,” sra. Gomez-Pieters a bisa. Recordando aña pasa ora tabata tin e deadline di pago pa impuesto di vehiculonan di motor, caminda cu tabata tin fila basta largo di hende cu a paga online anto a dura hopi largo pa haya nan sticker. Esaki tabata sistemanan cu no tabata comunica cu otro, of procesonan cu no tabata delinea di e manera cu por a duna servicio mas lihe. ”

“Nos a tuma e critica aki na serio y bay mesora man na obra pa brinda miho servicio na nos clientenan. Esaki ta e prome banco cu a keda cla y nos ta sumamente contento cu e colaboracion. Ta trabaonan duro cu nos tin tras di lomba pero mi ta kere seguramente e lo bay beneficia clientenan cu ta bay haci pago di impuesto via e portal online. Y despues den futuro caminda por reduci e fila y tempo di espera pa nan por haya sticker of comprobante di pago,” sra. Gomez-Pieters a splica.

Terminologia di pago ta keda mescos
Ora ta papia di terminologia di pago pa Departamento di Impuesto of cualkier otro tipo di impuesto, e departamento ta keda uza e mesun terminologia cu e cliente ta custumbra cu ne.
Ora cu un persona drenta den e sistema e lo mira DIMP cual ta un abreviacion corto pa Departamento di Impuesto, cu e impuestonan na banda cu nan lo kier bay paga; BBO, BAZV, Erfpachtcanon etc.

Loke e departamento kier stimula ta pa paga online pero no ta tur hende ta obliga pa haci esaki segun sra. Gomez-Pieters. E departamento kier stimula esaki pasobra e ta gratis, hopi eficiente y facil. E siguiente paso cu e departamento kier bay traha riba dje no solamente pa pago, pero tambe e formularionan di impuesto cu clientenan tin cu entrega. E departamento kier bay ofrece e formulario aki digital y emiti esaki, sin cu tin cu sali for di su cas para den fila largo.
“Nos ta semper mirando con nos por drecha e experiencia di cliente. E ta conta pa sector priva pero tambe pa sector publico. Y nos como departamento lo kier ta e front runner riba e tereno ey.

Caminda cu nos ta duna un experiencia di cliente riba nivel cu e cliente ta spera,” e directora ta comenta.

Proceso
Darrel Faro, kende ta business information manager na Departamento di Impuesto, a splica un tiki riba e proceso cu lo cana unabes cu e pago wordo haci den e parti tecnico. Unabes bo paga pa por ehempel Motorrijtuigbelasting online, bo tin cu bay yena algun cos manera bo persoonsnummer, e periodo cu bo kier pag’e, y tambe bo tin cu yena bo nummerplaat completo den e caso aki.

Ora yena tur cos esey ta percura pa no tin eror unabes cu e departamento ricibi e bank statement. No ta asina cu unabes bo paga online despues di cinco minuut bo por bin departamento di impuesto y ricibi loke a paga pe segun sr. Faro.

Unabes bo paga online, e siguiente dia departamento di Impuesto ta ricibi e end of day Bank Statement 7’or di mainta. Esaki lo bay riba un secured server di Aruba Bank, unda e departamento despues ta gara e file y upload den e ‘core system’. Unabes cu e file aki yega eynan, e ta busca matching a base di informacion cu a wordo yena. Si esaki a wordo yena corecto, e sistema lo por saca matching afo unda cu e pago lo wordo haci. Esaki ta hopi bon pasobra atrobe, no ta necesario pa bay paga esaki na e departamento personalmente.