(AP)—E siman aki, un profesor di Universidad a kibra un record pa manteniendo e tempo mas largo bibando bou awa sin depresurisacion na un cabana pa buceadonan na Florida, Merca.
Joseph Dituri su di 74 dia bibando den un cabana bou awa, situa 9 meter bou di un lagun na Key Largo, no tabata hopi diferente compara cu e dianan prome desde cu el a muda den e cabana dia 1 di maart.
Dituri, ken tambe ta conoci como “Dr. Deep Sea,” ta come cuminda yen di proteina prepara cu microwave, ta haci ehercicio cu banchinan di resistencia, ta haci su pushup di tur dia y ta tuma un siesta di un ora. Al contrario di un submarina, e cabana no ta uza tecnologia pa ahusta e presion di awa cu ta aumenta.
E record prome tabata 73 dia, dos ora y 34 minuut, logra pa dos profesor di Tennessee—Bruce Cantrell y Jessica Fain—na e mesun localidad na 2014. Pero Dituri no tin plania pa djis kibra record y bolbe bek tera; e tin plania pa keda den e cabana te dia 9 di juni, ora e yega 100 dia y ta completa un mision bou awa yama “Project Neptune 100.”
E mission ta combina investigacion medico y di ocean cu alcance educacional, y tabata organisa pa e Fundacion di Desaroyo di Recurso Marina, ken ta doño di e habitat.
“E record ta un logro extra y mi ta hopi agradecido,” Dituri a bisa. “Ta un honor pa tin e record aki, pero ainda tin mas pa haci.”
Su investigacion ta inclui experimento dia tur dia den fisiologo pa monitoria con e curpa humano ta responde na e exposicion di presion extremo den plaso largo. “E idea akinan ta pa pobla oceannan di mundo, pa asina cuida nan pa medio di biba den nan y trata nan hopi bon,” segun e profesor.
E porcion di alcance di Dituri su mision ta inclui klasnan conduci online y presenta entrevista for di su studio digital bou awa. Durante e 74 dia cu a pasa, el a alcansa 2.500 studiante via klasnan onlion den ciencia marina y mas ainda cu su cursonan di ingenieria biomedico na Universidad di South Florida.
Aunke e ta bisa cu e stima biba bou awa, tin un solo cos cu e ta haya falta di dje: “Loke mi ta haya falta di dje mas ta e solo,” Dituri a bisa. “E solo tabata un factor grandi den mi bida—usualmente mi ta bay gym 5or di mainta y ora mi bay cas mi ta mira solo subi.”
