(AP) – Cera na cas durante e pandemia 3 aña atras, hoben di 13 aña Shreya Nallamothu a nota un moda nobo mientras e tabata riba rednan social; Muchanan mas chikito cune tabata e celebridadnan, bailando, actuando y siendo nan mes.
Sinembargo, mas e tabata mira, mas publicacion di muchanan ta promociona productonan a cuminsa surgi, of videonan di nan erornan birando viral, y esaki a trece dilanti e pregunta; Ken ta protehando e muchanan aki?
“Mi a realisa cu tin hopi explotacion cu por pasa dentro di e mundo di ‘kidfluencing’,” Nallamothu a expresa, refiriendo na genera placa cu e contenido riba rednan social unda ta haci uso di muchanan. “Mi a realisa cu no tin ningun legislacion na luga pa proteha nan.”
Autoridadnan na Illinois tin e meta di cambia esaki pa medio di converti e estado den loke nan ta bisa lo ta e prome den e pais cu lo crea proteccion pa influencersnan riba rednan social cu ta mucha. Nallamothu, ken awo tin 15 aña, a trece dilanti su preocupacionnan na e Senador di e estado David Koehler ken a cuminsa cu e legislacion.
E proposicion lo duna ‘kidfluencers’ cu tin menso di 16 aña di edad derecho riba un porcentahe di e ganashi basa riba con frecuente nan ta aparece den videonan of contenido online cu ta genera por lo menos 10 cent pa cada bista. Pa cualifica, e contenido mester ta crea na Illinois y e muchanan lo mester aparece den por lo menos 30 porciento di e contenido den un periodo di 30 dia.
‘Vloggers’ (personanan cu ta graba videonan tocante nan bida diario), lo keda responsabel pa mantene un record di un mucha su apariencia den e videonan y mester aparta ganashi pa e mucha den un cuenta pa ora cu nan cumpli nan 18 aña y si no cumpli cu esaki e mucha por demanda.
E proposicion a keda aproba unanimente den e Senado di e estado na maart y ta den plan pa cay bao consideracion na e Cas Blanco e siman aki. Si esaki haya aprobacion, e proposicion lo bay back na e Senado pa un voto final prome cu esaki yega na e gobernador J.B Pritzker, ken a expresa caba intencion di firma esaki den e lunanan binidero.
Videonan familiar por mustra muchanan te hasta for di dia cu nan nace y mustra eventonan familiar of logronan, cual ta e tipo di videonan cu Nallamothu inicialmente tabata mira. Sinembargo expertonan ta bisa cu e industria comercialisa aki, cual por genera miles di dollar pa e creadornan di contenido, no ta regula y por te hasta causa daño.
“Nos ta mirando cu e carera di influencer ta birando un carera cu cada biaha ta mas viabel pa nos muchanan y hobennan. Nos mester corda cu esaki ta un carera unda ley te ainda no a yega mesun leu,” Jessica Maddox a comenta.
El a agrega cu muchanan cu ta influencer “ta den un necesidad grandi di tin e mesun proteccionnan cu a duna otro muchanan cu ta traha.”
