Dia 24 di juni ultimo, Gobierno di Aruba a informa riba e prijs y cobertura pa loke ta trata seguro di Covid-19 pa tur turista cu lo kier bishita Aruba. Un informacion cu segun e comentarionan di e mesun turistanan riba rednan social, a causa cu e mayoria di nan lo cancela nan biahe di vakantie pa nos isla.

E seguro lo ofrece cobertura pa tur gasto medico cu e turista lo mester pa trata Covid-19 den caso cu un persona cu ta sigura caba sali positivo.

Esaki lo inclui consulta medico te hasta 500 dollar, medicina, permanencia den hospital of ICU, radiografia, honorario di specialistanan, gasto di laboratorio y gasto di enfermeria.

Tambe lo inclui costo di aislamento pa pashentnan cu lo resulta positivo pa Covid-19 te hasta un maximo di 125 dollar pa dia, pa 14 dia. Asina tambe lo cubri bishitanan regular pa dokter y 4 prueba di siguimento durante e periodo di aislamento, cu tin un prijs di 75 dollar cada un. Ademas di transporte, cu tin un cifra di 350 dollar pa persona. E total di e seguro aki no mester surpasa 75.000 dollar.

Ayera dia 26 di juni a wordo publica e website www.edcardaruba.aw, e cual lo ta obligatorio pa turistanan por drenta Aruba. Esaki ta un registro di biahe online na unda turistanan mester haya un permiso pa aborda un avion, si e persona lo keda cualifica e por drenta Aruba ,pero mester haci e prueba di Covid-19 y haci varios pregunta segun e ley di inmigracion y reglamento di salud. Di esaki, e website ta señala cu e persona lo haya un e-mail 72 ora prome di e biahe pa informa tocante su solicitud.

Si e persona no keda cualifica pa biaha, por manda un prueba di laboratorio cu ta indica cu e no ta contagia cu Covid-19.

Tambe a keda conoci cu e prijsnan ta diferente dependiendo di e edad di e persona cu lo biaha y su tempo di bishita pa e isla. Pa personanan entre 15 pa 75 aña, e prijs ta desde 15 dollar pa dia, si su estadia tin mas di 7 dia ta baha pa 10 dollar, 5 dollar despues di 14 dia y 0 dollar pa despues di 49 dia.

Muchanan hasta 14 aña ta sigura gratis, pero ta aplica un prijs di administracion fiho di 10 dollar. Hende grandi tambe ta depende di tempo di estadia y ta cuminsa cu 21 dollar pa dia, 14 dollar despues di 7 dia, 7 dollar despues 14 dia y 2.80 dollar despues di 49 dia.

Tocante esaki, hopi pregunta y comentario tin riba rednan social di personanan di varios pais pa loke ta trata prijsnan principalmente. Tambe a trece dilanti cu no ta realistico e hecho di haci un prueba di PCR y haya e resultadonan 72 ora despues di e biahe. Ademas a keda conoci cu e test rapido no ta disponibel na New York, mercado principal di turistanan di Aruba.

Hopi comentario por mira riba pagina Facebook di e corant Aruba Today, cu ta bisa cu no lo paga asina tanto placa pa bishita Aruba. Por ehemplo un persona for di Inglatera a expresa cu si lo dicidi di haci un biahe di vakantie, lo scoge otro luga pa bay.

“Poniendo e costo enorme aki riba e contribuidonan mas grandi na economia di Aruba lo tin resultado negativo, ami lo bay otro caminda! Tin cantidad di mundo pa mira!”, Sherry Pence a comenta.

“Nos ta doño di un cas na Aruba y usualmente ta pasa 6 luna cada aña na e isla – esaki ta asina indignante… realmente mi no sa kico nos ta bay haci. Esey ta nifica $5,500 pa mi esposo y ami pa e seguro obligatorio so – no ta bon!”, Cyndi Dieleman De Young tambe a trece dilanti.

“Well… mi ta supone cu nos tripnan dos bes pa aña na nos timeshare na Aruba unda usualmente nos ta keda pa un luna cada bes no lo tuma luga pa nos mas… $900 ta demasiado caro pa cada biahe pues nos lo ta biahando den Merca te cu seguro di covid no ta necesario” Ann Wallick a comenta.

“Mi ta supone nos no ta bay Aruba pa un tempo”, Lisa Miville a bisa.

Asina mes, minister presidente Evelyn Wever Croes durante un conferencia di prensa a expresa cu habrimento di frontera cu pa 10 di juli lo mester habri pa Merca. El a mencion cu a pone condicionnan hopi leu, condicionnan pa protege esunnan cu ta bin Aruba y specialmente nos cu ta biba akinan. “E seguro cu nos ta pidi y mas exigencianan ta e maximo cu nos por haci na e momentonan aki, mas cu esey nos no por haci, sino aeropuerto lo keda cera y esey no ta un opcion”, minister presidente a afirma.

 

 

 

 

1 COMMENT

  1. Hopi erg.nos ta rubiano biba den koninkrijk.y cu nos seguro
    Pa nos rubiano e ta duro.
    Nos tin famia mama Tata. Opa Oma kleinkind etc na. Aruba,
    Y si bo ta half rubiano. Tambe bo tin Hopi famia na Aruba.
    E tourists nan por kies. Cur, Bonaire st Maarten etc. e lugarnan ey tambe ta parce Aruba.
    Nan por save e gaston an ey. Pero nos rubiano no por. Paso nos ta bin pa nos famia
    Danki. Regering di Aruba

LEAVE A REPLY

Please enter your comment!
Please enter your name here