Desde ayera, 26 di mei Dr. Horacio E. Oduber Hospital ta suavisa e regla un poco pa asina permiti famia of conoci pa bishita nan ser keri den Hospital. Na fin di luna di maart Dr. Horacio E. Oduber Hospital a intensiva regla pa loke ta bishitante di pashentnan admiti, esaki ta pa minimalisa riesgo di contagio en conexion cu coronavirus.

Bishitantenan mester tene na cuenta si cu pa algun departamento tin excepcion. Tambe ta importante pa menciona cu si un pashent tin coronavirus e no por ricibi bishita pa asina minimalisa riesgo di contagio.

Regla:
Desde diamars, 26 di mei ta permiti solamente 1 (un) bishitante mayor di edad (18 aña of mas) pa pashent interna. Esaki lo sosode na un orario fiho cu un duracion di 1 ora. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber.

Bishitante:
Na momento di yega Hospital por fabor acudi na nos miembro di siguridad den e lobby na entrada principal. Nan lo haci bo persona algun pregunta prome cu permiti entrada. Eynan ta ricibi un carchi cu e number di camber riba dje, cual ta e prueba pa por subi y haci e bishita na e orario stipula. Na momento di termina bo bishita mester entrega e carchi aki back cerca e personal di siguridad. Corda haci uzo di e ora aki pa trece paña of cualkier otro cos di cas pe pashent.

Excepcion.
Pa algun pashent tin excepcion cual ta rekeri un dagpas, manera cuido intensivo (ICU), departamento di mucha y maternidad. Tambe tin excepcion den caso cu pashent ta terminal. Tur e afspraaknan aki, manera ya ta e caso, ta wordo traha hunto cu e manager di e departamento, pashent y famia.

Porfabor mantene un bon higiena di man haciendo uzo di nos hand sanitizers situa na diferente luganan strategico prome y despues di haci bo bishita. Si bo persona tin cualkier pregunta por tuma contacto cu e manager di e piso unda bo famia/ conoci ta admiti.
Directiva, staf y personal di Hospital ta gradici tur hende pa nan comprension y cooperacion. Hunto nos por combati’e!

LEAVE A REPLY

Please enter your comment!
Please enter your name here