Un compania di biotecnologia Mericano a cuminsa inyecta un candidato pa vacuna di coronavirus den hende na Australia ayera cu speransa di lansa un vacuna aproba e aña aki.

Novavax lo inyecta 131 boluntario den e prome fase di e test, pa evalua siguridad di e vacuna y busca señal di su efectividad, segun hefe di investigacion di e compania, Dr. Gregory Glenn, a bisa.

Alrededor di un decena di vacuna experimental contra coronavirus awo ta den etapa inicial di test of prepara pa cuminsa, principalmente na China, Merca y Europa. No ta cla si algun di nan lo proba di ta efectivo y safe. Pero hopi ta traha den diferente forma, y ta traha cu diferente tecnologia, aumentando chens cu sikiera un di nan por ta exitoso.

“Nos ta den parallel haciendo dosis, haciendo vacuna den anticipacion cu nos lo por mustra cu e ta traha y tin capacidad pa cuminsa lansa esaki pa fin di aña aki”, Glenn a bisa un conferencia di prensa virtual na Melbourne for di sede di Novavax na Maryland.

Test den animal ta sugeri cu e vacuna ta efectivo den dosis abou. Novavax por fabrica sikiera 100 miyon dosis e aña aki, y 1.5 biyon na 2021, el a bisa.

Fabricacion di e vacuna, yama NVX-CoV2373, tabata siendo aumenta cu $388 miyon inverti pa e Coalicion pa Innovacion den Preparacion pa Epidemia basa na Noruega desde maart, Glenn a bisa.

Resultadonan di e prome fase di test clinico na Melbourne y Brisbane ta spera pa ta conoci na juli, Novavax a bisa. Miles di candidato na varios pais lo ta involucra den e segundo fase despues.

E estudio a cuminsa cu seis boluntario ken a ricibi inyeccion cu e vacuna potencial na Melbourne ayera, segun Paul Griffin, experto di malesa infeccioso cu colaborador Australiano, Nucleus Network.

Mayoria di e vacuna experimental den progreso tin como meta pa train sistema immuun pa reconoce e proteina ‘skerpi’ cu ta cubri e superficie exterior di coronavirus, preparando curpa pa reacciona si ta exponi na e virus real. Algun candidato ta traha usando unicamente e codigo genetico pa e proteina aki, y otronan ta usa un virus no dañino pa entrega e informacion productor di proteina. Otro candidatonan ta usa e version mas antiguo, e virus henter, morto.

Novavax ta agregando otro manera na e lista aki, loke ta yama un vacuna recombinante. Novavax ta usa ingenieria genetico pa crea copianan no dañino di e proteina ‘skerpi’ di coronavirus den gruponan grandi di celula di insecto den laboratorio. Cientificonan ta extra y purifica e proteina, y paketa esaki den nano particula di size di virus. “E forma con nos ta traha un vacuna ta cu nunca nos ta mishi cu e virus”, Novavax a bisa AP luna pasa. Pero na final, ‘pa e sistema immuun e ta mustra igual cu un virus’. Ta e mesun proceso cu Novavax a usa pa crea un vacuna di nanoparticula di grip cu recientemente a pasa e test di ultimo etapa.

 

LEAVE A REPLY

Please enter your comment!
Please enter your name here