Hotel Hyatt Place projecta pa ta cla september 2018

ORANJESTAD – E inicio pa e hotel nobo Hyatt Place banda di aeropuerto a tuma luga ayera den presencia di entre otro e inversionistanan Venezolano y ministernan di Turismo y Labor. E ta encera e prome fase cu ta rekeri un inversion di mas di 30 miyon dollar.

E proyeccion ta pa e hotel di 116 camber keda cla na september 2018. Nan ta enfoca riba e clientenan empresario, asina Luis Cano ta bisa, un comerciante Venezolano cu ta 10 aña activo na Aruba. E ta e doño di Aruba Industrial Services, representando entre otro Caterpillar. “Nos ta enfoca riba e mercado di Noord- y Zuid America y e region aki. Tambe riba clientenan cu ta biaha pa Hulanda anto keda un par di dia aki.”

Sr. Cano ta bisa cu nan no ta enfoca riba e mercado turistico den prome instante y e plan ta pa desaroya un centro di comercio na e luga. Ora e hotel lo keda cla, e ta bay divulga mas di e plan aki. Sinembargo el a indica caba cu ta trata di salanan unda por tene conferencia, fiesta y tambe un centro comercial.

Ora di puntra si nan no tin miedo di e efecto di Airbnb pa nan proyecto, como cu mas y mas hende na mundo ta opta pa keda cerca apartamento of camber di hende priva, sr. Cano ta contesta: “No, pasobra manera mi a splica, nos ta enfoca riba e cliente empresario.”

Prome plan den Caya Grandi
Tabatin plan den pasado caba pa habri un Hyatt Place den centro di Oranjestad. Na e luga banda di Bon Bini. Sinembargo e proyecto no a bay door y awor a hala esaki na e tereno cu pa hopi aña tabata na benta, esta pariba di aeropuerto Reina Beatrix. Director di aeropuerto Jim Fazio a bisa ayera cu e ta hopi contento pa mira finalmente desaroyo cerca di nan. Asina e deseo pa crea un zona comercial rond di aeropuerto ta birando mas y mas realidad, e ta indica. Y manera mayoria aeropuertonan na mundo, semper nan tin un hotel cerca di nan.

Minister di Turismo Mike de Meza a indica cu e proyecto aki claramente ta yuda nos economia, y sigur turismo. E ta haya esaki tambe un mehoracion di servicio como cu asina Aruba por ofrece diferente hotel. Mester bisa si cu mas y mas hotel na Aruba ta enfocando riba e cliente/turista empresario. Talk of the Town, e hotel cu semper tabata mas cerca di aeropuerto a caba di renoba na un forma y cu facilidad, pa asina atrae mas cliente empresario. Mas leu tin Renaissance Marina Hotel cu tambe ta promove su mes como hotel pa cliente empresario, como cu aki no ta permiti muchanan. Sinembargo hasta na Palm Beach mas hotel a profila nan mes den transcurso di aña como un bon destinacion pa mercado empresario.

E ultimo hotel grandi cu Aruba a haya nobo, tabata Ritz Carlton na 2013. Desde e aña ey gobierno a purba di habri mas hotel, entre otro Hard Rock Hotel na e luga di ex Bushiri Hotel y e all-inclusive Bahia Principe, cual ambos no a logra finalmente. E grupo local tras di Hard Rock no por a cumpli financieramente y e grupo Piñero di Spaña a hala atras na momento cu gobierno a anuncia re-apertura di e refineria na San Nicolas.

You May Also Like

Ghisbert Boekhoudt Director di DNM: Cobamento di santo ta un destruccion grandi na medio ambiente

ORANJESTAD – Director di Departamento di Naturalesa y Medio Ambiente (DNM) sr. Ghisbert Boekhoudt ...

STA: Situacion di Serlimar ta mescos cu candela di dump

Presidente di STA, Diego de Cuba a declara na Bon Dia Aruba cu e ...

A3 24nov desaroyo di malaria.jpg

Malaria a yega cifra record na Venezuela na 2015

ORANJESTAD – Autoridad di GKMB a bisa di ta monitor e situacion di vector ...

Mocion di desconfiansa contra Paul Croes den prome reunion di parlamento nobo

Ayera a tuma luga e prome reunion publico di parlamento nobo riba e status ...

image.jpeg

CEO di Tiara Air sr. Alejandro Muyale: Duna nos un chens y bin purba nos vuelonan

Yen di entusiasmo, CEO di Tiara Air sr. AlejandroMuyale a regresa Aruba  despues cu e compania local aki a realisa su ...