(NLTimes) – Compania di tecnologia Chines, Huawei, ya no ta suministra componentenan na e rednan central 5G di proveedornan di telecomunicacion mayor na Hulanda, FD ta reporta. E decision probablemente ta resultado di varios servicio secreto Hulandes descubriendo cu e compania ta un brasa largo di gobierno Chines, potencialmente representando un menasa na seguridad nacional di Hulanda.

E actualisacion ta yega apenas un luna despues cu un reporte investigativo den De Volkskrant a sugeri cu Huawei facilmente tabatin acceso na e red mobil KPN un decada atras. Esaki a duna Huawei e habilidad pa spiona riba comunicacion di numbernan di telefon riba red KPN, incluyendo esun di prome minister Jan Peter Balkenende, disidentenan Chines, y oficialnan top di gobierno.

FD a reporta cu un aña y mey atras, gobierno Hulandes a crea e posibilidad di duna orden na proveedornan di red pa elimina ekipo suministra pa ‘proveedornan no confiabel’ for di nan rednan. Lider di mercado, Huawei no a wordo menciona explicitamente e tempo ey. E instruccionnan concreto cu e gabinete a duna na companianan di telecomunicacion no ta conoci.

Mientras tanto, tur tres proveedornan mayor na Hulanda, esta KPN, Vodafone y T-Mobile, a ricibi un decision tocante ki cambio nan mester implementa na nan red, segun Ministerio di Asuntonan Economico. E contenido a wordo declara un secreto estatal, y companianan no ta permiti pa revela ningun informacion riba esaki, FD a reporta.

Vocero Hulandes pa e compania tecnologico Chines si a confirma: “Nos no ta suministra ekipo central 5G na Hulanda.” Representante di Huawei no tabata capaz di duna mucho claridad riba e asunto mas ampliamente, pero a bisa cu ya no ta pidi e compania pa e partinan mas critico di e rednan. Ainda ta pidi nan pa provee antena. “Esey ta unda nos ta den e mercado”, nan a bisa.

Ta parce cu e consecuencianan ta mas grandi pa T-Mobile. E compania a bisa cu awo ta usa seis bendedor diferente, maske e gran mayoria di su red anteriormente tabata construi cu ekipo di Huawei, FD a bisa. E compania a bisa cu pa motibo di e naturalesa secretivo di su comunicacionnan cu gobierno, cu no por discuti e asunto y no por revela si ya a reemplasa e ekipo.

KPN anteriormente a anuncia cu lo reemplasa ekipo di Huawei den centro di su red cu ekipo di compania Sueco, Ericsson. E otro proveedor Hulandes afecta, Vodafone, ta bisa di ta menos dependiente riba e fabricante Chines compara cu su otro dos competidornan mayor.

Na 2012, Merca tabata e prome pais pa prohibi ekipo di red di e gigante Chines, pa miedo cu lo por usa su ekipo pa spiona riba otro pais y companianan. Huawei desde e tempo ey a enfrenta prohibicion na un cantidad di pais rond mundo pa motibo di su supuesto relacion cercano cu gobierno Chines.