(AP) – Thailand a cuminsa lansa un grupo di cacho riba caya, ken aparentemente por identifica e personanan cu tin COVID-19, como un intento di por controla e brote nobo di casonan den e pais.

Angel, Bobby y Bravo, ta 3 di 6 labrador retriever cu a ser cria pa cientificonan na e facultad di veterinario di Bangkok’s Chulalongkorn University. Nan a siña con pa detecta un fragancia cu solamente hendenan cu tin COVID-19 ta produci den nan sodo.

Desde dia 10 di mei, e 3 cacho nan aki a test mas cu 1000 hende, incluyendo trahadonan di e scol, studiantenan y hendenan rond di e scol, y te cu awo e resultadonan ta sumamente bon. Despues di hole e muestra cu e tuma di e persona, e cachonan por a identifica ken ta esun nan cu tabatin COVID-19. Si e persona ta negativo, e cacho ta sigui cana pa e siguiente muestra, pero si e persona ta positivo, e cacho ta sinta dilanti e muestra.

Kaywalee Chatdarong, ken ta e lider di e team cu ta trahando den e proyecto aki, a bisa cu el a haya sa cu otro paisnan ta uzando cacho pa identifica infeccionnan di coronavirus, pero e tabatin duda si e tactica aki lo funciona den su pais pa motibo cu tur caminda bo ta haya e holo di e sabornan usa den nan cuminda y cultura.

Suwanna Thanaboonsombat, un boluntario cu ta colecta e muestranan pa e laboratorio, a bisa cu e cachonan aki ta agrega un elemento hopi conveniente pa motibo cu nan por check muestra di personanan cu no por sali bay test na un laboratorio, pa motibonan di trabou of cualkier otro.

“E personanan solamente mester pone un ? Bao di nan brasa pa colecta nan sodo, y manda nan pa e laboratorio. Pa asina e cachonan por hole e sodo y asina duna un resultado efectivo y corecto.

E plan ta di hiba e cachonan aki unda tin aglomeracion grandi di persona, y ta sospecha cu tin hopi infeccion di coronavirus, asina e cachonan por traha den un van dedica pa esaki, mientras cu e otro hendenan por traha den ciudad y otro facilidad nan haciendo test nan personal.

Segun e U.S Center For Disease Control and Prevention, cachonan ta un di e animalnan cu e riesgo mas minimo di contagia cu coronavirus, y pa e motibo aki, tin un riesgo mas abao ainda di contagia hendenan cu e virus aki.

Sinembargo, e team a diseña e container di e muestranan, di manera cu e nanishi di e cachonan no ta drenta den contacto cu e muestra, y asina evita hopi mas e contagio di e cachonan.

Lawaylee ta bisa cu aunke e cachonan ta un forma efectivo, lihe y di menos costo pa haci testnan di coronavirus, e ta bin cu su limitacionnan. E cachonan mester come 5or di atardi, pa e motibo aki, mas o menos rond di 4:50pm nan ta cuminsa distrae, ya cu nan ta cuminsa sinti hamber, y despues di come, nan no por laga e cachonan aki sigui traha pa motibo cu nan mester drumi tambe.

“Nan ta animalnan cu ta biba, sinti y tambe tin nan necesidadnan, y nos no por ignora esaki.” Kawaylee ta agrega.