RBM Estates a perde e caso contra gobierno y Aruba Birdlife Conservation (ABC) pa cu e tereno na Bubali Plas.
Hues a dicta cu e compania no ta admisibel. A base di hurisprudencia e no ta mira cu RBM ta un partido den e caso di ABC contra gobierno. E caso aki ABC a gana den sentido cu gobierno no mag di duna permiso pa construccion riba e tereno cu ta den zona berde.
E di dos punto cu hues a trece dilanti ta cu RBM no tin e derecho mas riba e tereno pa motibo cu e ‘optierecht’ a caduca na januari. Minister di Infrastructura a duna e derecho di opcion na 2014 y a extende e periodo aña pasa te cu 18 di januari. Pues awor e ora e compania no tin nada legal den man mas.
Pa e dos motibonan ey hues a haya cu RBM no ta admisibel den e caso y a condena e partido di paga e gastonan legal di ABC y Pais Aruba di 1500 florin.
Dialuna e fuente NoticiaCla a publica cu minister di Infrastructura lo bay cambia e ley ROP pa asina e tereno aki na Bubali Plas lo no cay mas den e zona berde. Pa asina e por percura cu e compania por haya un permiso finalmente. RBM kier traha un resort di condominium riba e tereno.
