(AP) – Hues riba diabierna a nenga e intento mas recien pa descarta un caso criminal contra di e actor Jussie Smollett, ken ta acusa di a gana polis na momento cu el a reporta cu e tabata victima di un atake racista, anti-homosexual na Chicago den januari di aña 2019.
Un abogado di e actor anterior di “Empire” a bia cu Smollett su derechonan ta siendo viola pa motibo cu ya el a cumpli cu servicio na comunidad y a paga un boet di 10,000 dollar bao di un trato anterior cu e fiscalnan di Cook County pa retira e cargonan.
“Un trato ta un trato. Esey ta un principio anciano,” abogado Nenye Uche a bisa.
Pero e Hues James Linn a nota cu Smollett su caso aworaki ta bao di maneho di un fiscal special cu otro Hues mes a encarga, cual ta un areglo cu e no por kibra.
Linn a bisa cu e seleccion pa e hurado lo cuminsa dia 29 di november.
Smollett, un homber homosexual cu un tono di piel scur, a bisa polis den aña 2019 cu dos homber cu cara tapa a ataca su persona ora cu e tabata na Chicago grabando pa e programa “Empire.” Pero el a keda acusa siman despues di a entrega un reportahe falso, despues cu e investigadornan a conclui cu el a fabrica e atake y a paga e dos ruman homber pa haci e trabao, pa motibo cu e no tabata satisfecho cu su salario, y kier a promove su carera pa medio di farandula y noticia. E caso a keda cancela.
Despues di un tempo, e caso a keda revivi ora cu un fical special a acusa Smollett cu conducta desordena tocante e reportahenan entrega na e polis. E actor a declara su mes inocente pa cu e cargo aki.
Aunke Uche a purba di haci cu e caso keda descarta, el a bisa Smollett kier “nada mas cu para dilanti hurado y limpia su nomber.”
