Un hues Britanico a nenga diahuebs di permiti fundado di WikiLeaks, Julian Assange sali di un caha di glas y sinta cu su abogado durante un audiencia di corte na London riba si lo mester extradit’e na Merca.
Assange a keha di tin problema pa scucha y concentra durante e prome cuatro dianan di e audiencia na Woolwich Crown Court, un corte di siguridad halto na London. Ademas el a bisa cu e no por comunica facilmente cu su team legal for di e caha patras di e sala di corte.
Su abogadonan a describi Assange como un ‘persona vulnerabel’ kende ta sufri di depresion. Pero hues di districto, Vanessa Baraitser, kende ta presidiendo riba e audiencia di extradicion, a nenga e peticion. “Mi no a tende ningun aspecto particular di bo condicion cu ta rekeri pa bo sali di e caha y sinta cu bo team legal”, el a bisa.
Assange, di 48 aña di edad, ta busca na Merca pa cargo di spionahe tocante leak di documentonan clasifica di gobierno algun decada atras. Fiscalnan Mericano ta acus’e di conspira cu analista di inteligencia di ehercito Mericano, Chelsea Manning pa crack un password, hack den un computer di Pentagono, y revela centenares di miles di cable diplomatico y documentonan militar riba e gueranan na Irak y Afghanistan.
Assange ta mantene cu e tabata actuando como un periodista cu derecho pa proteccion di Prome Amienda. Su abogadonan a argumenta cu cargonan Mericano di spionahe y mal uso di computer tin motibo politico y ta un abuso di poder.
Su audiencia di extradicion ta programa pa resumi dia 18 di mei, dia cu ambos banda lo presenta evidencia pa sostene nan caso. Si e ser condena na Merca, e ta enfrenta un sentencia maximo di 175 aña di prison.
Assange ta deteni na Belmarsh Prison na London desde april 2019, na momento cu a sak’e di embahada Ecuatoriano na London. El a huy di su libertad condicional y a tuma refugio den e embahada shete aña prome pa evita di bay Suecia pa enfrenta acusacion di abuso sexual y violacion.
