Den su veredicto di awe, diaranzon 23 di juni 2021, huez mr. M. Soffers, di Juzgado di Promer Instancia, a dicidi cu gobierno mester duna partido AVP, pa mas tarda dia 24 di juni 2021 pa 12:00 di merdia, un copia di e registro di votador, cu ta contene e nombernan y e distrito unda nan ta vota. E demanda cu e partido a entrega na corte tabata pa suspende e decision di gobierno ā€“ ministro di asunto general mas specificamente ā€“ pa no duna e partido ningun informacion mas di e registro di votador. E demanda tabata encera e exigencia pa entrega, pa mas tarda 12:00 or di merdia di 24 di juni nomber, adres, fecha di nacemento y number di e distrito unda e votador mester bay vota, den forma digital.

Di banda di e demandante a trece entre otro dilanti cu e articulo 10 di Kiesverordening no ta en pugna cu articulo 8 di Tratado Europeo di Derecho Humano (EVRM) ya cu e otorgamento di e datonan ta cumpli cu e exigencia cu e ta regla den ley. Ademas cu tin otro pais den Reino cu tin e mesun legislacion (Corsou).

Di banda di gobierno (y Conseho Electoral) a argumenta cu e articulo 10 inciso uno di Kiesverordening ta un infraccion di e ambito priva di persona y ta en pugna cu e Tratado. Dunamento sin ningun restriccion di tur dato di e Registro na partido(nan) ta un infraccion fuerte di e ambito priva di tur persona, y cu gobierno, anticipando un cambio di ley pa elimina articulo 10, a dicidi cu no ta duna e partidonan e lista mas.

Huez Soffers, despues di scucha e argumentonan di ambos banda, a dicidi cu den su posicion di huez den un caso cu ta encera un prevision provisional (voorlopige voorzieningā€™) no ta autorisa pa expresa su mes tocante e pregunta den ki sentido e infraccion contra articulo 8 di EVRM ta permisible, ya cu esaki lo requeri tratamento den e ā€˜bodemprocedureā€™. Por lo tanto e huez ta yega na un veredictio a base di un ponemento den balance di e interesnan envolvi.

A base di esaki ta yega na e veredicto cu ta suspende e decision di gobierno, cu e partido demandante mester haya e datonan, sin embargo limita na e nombernan y e number di e distrito unda e persona mester vota, y ademas cu esaki no mag di ta un lista digital.

Te aki nos relato; despues lo sigui mas detaye.

LEAVE A REPLY

Please enter your comment!
Please enter your name here