(AP) – Hugh Grant a acepta un “cantidad di placa enorme” pa aregla un demanda unda e ta acusa e revista The Sun di ilegalmente monitor su telefon, pone dispositivo pa scucha den su auto y drenta su cas pa spia riba dje, e actor a bisa diaranson despues cu e areglo a keda anuncia den corte.
Grant, ken conhuntamente cu Prins Harry a demanda News Group Newspapers a bisa cu el a acepta pa motibo cu e por a keda pega cu un gasto legal grandi aunke e gana den e huicio. Bao reglanan di corte civil, e lo mester paga e costonan legal di ambos banda si e ricibi menos di e cantidad cu e areglo ta ofrece.
“Manera ta comun cu personanan completamente inocente, nan ta ofreciendo mi un suma enorme di placa pa mantene e caso aki fuera di corte,” Grant a bisa riba e plataforma X. “Hasta si tur acusacion keda comproba den corte, toch mi lo mester cubri gasto cu ta yega te hasta 12.4 miyon dollar den gasto.”
E cantidad di e areglo no a keda revela. NGN a bisa den un declaracion cu e no a admiti ningun culpabilidad y cu e areglo tabata den e interes financiero di ambos partido pa evita un huicio cu lo ta costoso.
Grant y otro victimanan a acusa cu NGN, un subsidiario di e emporio di media crea pa Rupert Murdoch, a comete violacion di nan privacidad via actividadnan fuera di ley cu ta inclui contrata investigadornan priva pa scucha nan yamadanan, pone dispositivo pa scucha den nan vehiculo y usa decepcion pa ricibi acceso na informacion confidencial entre 1994 te 2016.
Grant a bisa den su declaracion como testigo cu e nunca no por a saca afo ken a drenta su apartamento den ana 2011. E porta a ser kibra y e interior tabata mustra manera si un pelea a tuma luga pero nada no a ser horta. Dos dia despues, The Sun tabatin un articulo unda ta detaya e interior di su apartamento y “senalnan di un pelea domestico.”
El a bisa cu e tabata den shock ora cu un investigador priva contrata pa The Sun a revela cu personanan trahando pa e corant a drenta su apartamento y a pne un dispositivo pa rastrea y scucha den su auto.
Grant, ken anteriormente a yega un acuerdo den un caso contra Murdoch su News of the World pa hack su telefon a bisa cu e no lo keda keto.
Grant a bisa cu e lo dirigi e placa na gruponan manera Hacked OFf, cual a ser forma despues di revelacionnan di hacking den 2011 cu a causa un investigacion di gobierno contra e practicanan ilegal. Grant ta un miembro di e directiva di e grupo cu ta boga pa un prensa liber y responsabel.
Mientras News of the World a pidi despensa pa e hacking di celebridadnan, politico y famia di soldaatnan fayeci ademas di un studiante cu a fayece, The sun a resolve su casonan sin tin cu admiti responsabilidad ni culpabilidad.
