(AP) — E huicio pa un ex-lider di gang den area di Los Angeles, acusa di mata icono di musica hip-hop, Tupac Shakur na Las Vegas na 1996, a keda posponi cu varios luna, segun un hues a bisa diamars.
Hues di corte di districto Clark County, Carli Kierny a reconoce cu Duane “Keffe D” Davis su abogado, Carl Arnold tabata nobo den e caso, y cu fiscalnan ainda ta dunando material di evidencia na e defensa. El a cambia e fecha nobo pa e huicio, di dia 3 di juni pa dia 4 di november.
Davis ta deteni bao fiansa di $750mil desde su aresto na september, y ta spera cu e lo logra hunta e 10% necesario pa sali bay den aresto domiciliario, segun Arnold. Davis a bisa Kierny cu hende cu ta dispuesto pa yud’e paga su fiansa no kier presenta den corte pa un “audiencia di fuente” pa mustra cu e placa a ser obteni legalmente. “Mi tin famia cu ta duda di bin akiden y yuda mi cu e fiansa pa motibo di e medionan di comunicacion y e circo cu tin andando,” Davis a bisa.
Davis, 60, originalmente ta di Compton, California. E ta e unico persona ainda na bida cu tabata den un auto for di cual a lansa tiro na september 1996, matando Shakur y heridando magnate di rap, Marion “Suge” Knight den otro auto na un borchi di trafico cerca di Las Vegas Strip. Knight, awo 58, ta cumpliendo 28 aña den un prison na California pa un tiramento fatal no relaciona den area di Los Angeles na 2015.
Arnold a bisa reporteronan pafo di corte cu e ta kere cu Davis lo logra e siman aki cera e $75mil pa obtene libertad bao fiansa y bay den aresto domiciliario cu monitoreo electronico. Un audiencia di fuente por tuma lugar dentro di 30 dia, el a bisa.
A aresta Davis pafo di su cas den Henderson. El a declara inocencia na november pa cargo di asesinato den prome grado, y a keda cera den Centro di Detencion di Clark County na Las Vegas. Si e keda condena, e lo por pasa resto di su bida den prison.
Fiscal ta bisa cu nan tin evidencia fuerte cu Davis a incrimina su mes durante entrevistanan cu polis y medionan di comunicacion desde 2008, y den su propio memoir na 2019 liderando un gang di caya na Compton.
Arnold diamars a echo comentarionan di abogadonan anterior di Davis, bisando reporteronan cu Davis a skirbi e buki pa gana placa, manera otronan incluyendo un investigador di polis a haci. E tambe a nota cu polis y fiscalnan no tin un arma di asesinato ni e auto for di cual a lansa e tiro. El a bisa cu e estado lo mester proba cu Davis tabata na Las Vegas riba e anochi cu a mata Shakur.
Davis a skirbi cu a primintie inmunidad di proceso na 2010 ora el a bisa autoridadnan na Los Angeles cu e tabata sa di e tiramento fatal di Shakur y rapper rival, Christopher Wallace seis luna despues na Los Angeles. Wallace tabata conoci como The Notorious B.I.G. of Biggie Smalls.
Shakur tabatin cinco album No1., tabata nomina pa seis Premio Grammy y a keda introduci na 2017 den e Rock & Roll Hall of Fame. El a ricibi un strea postumo den Hollywood Walk of Fame aña pasa.
