Bar y café den e regionnan mas densamente pobla di Hulanda lo mester cera nan porta mas trempan cuminsando mañan, mientras e pais ta cuminsa re-impone restriccionnan pa combati un aumento grave di infeccion, particularmente entre studiantenan y hende di edad 20-29, segun gobierno a anuncia ayera.

“E coronavirus ta haciendo un comeback”, prome minister Mark Rutte a bisa den un conferencia di prensa transmiti via television nacionalmente, y a adverti cu mas medida por ta necesario si e cantidad di infeccion no cuminsa baha di nobo pronto.

Ademas di cera trempan – pa 1or di mainta – establecimentonan di hospitalidad, Rutte a bisa cu cualkier reunion di mas di 50 persona awo lo mester aplica pa un permiso di autoridadnan local. E restriccion ta aplica den seis region, principalmente den e occidente densamente pobla di e pais, y autoridadnan den e regionan aki probablemente tambe lo introduci otro medidanan local.

E regionnan afecta ta inclui e capital, Amsterdam como tambe ciudadnan mayor manera Rotterdam, Den Haag y Utrecht.

Comentarionan di Rutte a yega mientras Hulanda a registra un rij di cifranan record di infeccion den dianan recien, alcansando 1,977 den e 24 ora te cu diabierna mainta.

Na e conferencia di prensa solemne, Rutte a adverti cu si e pais no logra pone e virus bao control, e cantidad di infeccion nobo lo por aumenta den tres siman na mas di dies mil pa dia. El a urgi e pais pa mantene distancia social y cumpli cu medidanan di higiena, y traha for di cas lo mas posible.

Admision den hospital y ICU ta keda bao nivelnan alcansa durante e prome peak di e pandemia na maart y april, pero ta aumentando den simannan recien. Mas di 6,250 persona ta confirma di a fayece na Hulanda desde cu e brote a cuminsas, maske e cantidad berdadero ta mas halto pasobra hopi hende cu a muri bao sospecha di Covid-19 no a haci test.

“Esaki ta e segundo ola? Si, si nos mira e cantidad di infeccion, esaki ta e segundo ola”, minister di Salud, Hugo de Jonge a bisa. Pero el a agrega: “Si nos mira e situacion den hospital, nos no t’ey ainda. Hunto nos mester sigura cu esaki no bolbe pasa.”

Jacco Vonhof, cabesante di un grupo di industria chikito y mediano, a critica e decision di impone medida riba establecimentonan di hospitalidad ya den problema pa e impacto economico di e pandemia. El a yama e medida pa cera mas trempan ‘completamente desproporcional’ y a adverti cu bebedornan lo simplemente move bay otro caminda.

“Lo conduci na un aumento di hende reuniendo na cas y fiestanan ilegal despues di mey anochi”, el a adverti.

LEAVE A REPLY

Please enter your comment!
Please enter your name here