Minister di Turismo, Salubridad Publico y Deporte, Dangui Oduber a referi riba KLM su notificacion cu e compania aereo cu ta opera na Aruba tambe, ta imposibel pa nan keda efectua vuelonan intercontinental pa motibo di e ceramento di frontera.

Riba e asunto aki minister Oduber a bisa cu ayera tabatin un debate den Tweede Kamer riba e ceramento di frontera di Hulanda cu Latino America. E decision aki tambe lo por tin consecuencia pa Aruba. Hulanda tin e deseo pa Aruba cera su frontera cu Latino America. “E ta wordo considera y tin e posibilidad cu KLM lo stop e vuelo pa Aruba,” e mandatario a declara durante e conferencia di prensa di gobierno ayera.

Ayera tabatin un reunion di Crisis Team y si tin cualkier decision cu lo wordo tuma relaciona na ceramento di frontera cu Latino America, esaki lo wordo comunica debidamente na comunidad, e mandatario a declara.

 

E ta haya cu un decision asina ta complica mas ainda e situacion pa nos na Aruba. Ya cu si esey lo ta e caso KLM ta e aerolinea cu ta transporta e material di remedinan pa hospital. Pero tambe ta e aerolinea cu lo mester transporta e vacunanan contra Covid na mita di februari.

Si esaki sosode gobierno di Aruba mester busca otro alternativa pa garantisa cu e medicamento cu ta wordo suministra pa hospital keda manteni debidamente. Tur siman Aruba ta ricibi remedi for di Hulanda, y logicamente den e pandemia cu nos ta pasando aden mester garantisa e suministro di medicamento, segun minister Dangui Oduber.

“Ami no ta kere cu Hulanda ta asina iresponsabel di tuma un decision di stop e vuelonan di KLM y laga pais Aruba sin e remedinan cu ta sumamente necesario pa trata muy specialmente e pashentnan di Covid.”

 

Actualmente gobierno di Aruba ta den combersacion cu representacion Hulandes na Aruba (VNO) pa wak finalmente kico ta e posicion cu pais Aruba ta tuma relaciona cu Latino America.

LEAVE A REPLY

Please enter your comment!
Please enter your name here