“Nos no sa kico pa haci eigenlijk,” tabata e prome reaccion di boticarionan dialuna mainta, riba e pregunta si ta cobrando pa remedinan cu entrante April 1, ya no tabata cubri pa AZV. Y Organo Ehecutivo AZV tampoco tabatin un reaccion dialuna, riba e anuncio di Prome Minister Evelyn Wever Croes di diahuebs ultimo, esta cu ta elimina e lista positivo nobo pa remedi.

Den otro palabra, AZV no tabata informa di e decision di Gobierno y ayera henter dia, ehecutivonan di organo ehecutivo tabata den reunion riba e topico.

Pero ni e boticarionan y doñonan di botica tabata informa di e decision di Gobierno. Segun Heidi Marchena di Asociacion di Boticarionan, e anuncio a bin como sropresa.

“Te ainda nos no a haya ningun notificacion oficial, cu a hala e lista positivo aden. Ni di Minister di Salud Publico ni di Organo Ehecutivo di AZV, “ Heidi Marchena a bisa Bon Dia Aruba ayera mainta.

E decision cu AZV mester cubri tur remedi manera tabata e caso prome cu April 1, mester a drenta na vigor dia 1 di Mei. Pero, Bon Dia Aruba mes tabata presente ora cu na un botica cu tabata cobra pacientnan pa cierto remedi, pa motibo di no a haya notificacion formal.

“Nos ta trahando pa hala bek e cobranza, poco poco. Pero nos no a haya nada oficial y a yama AZV caba,” Marchena a sigui bisa.

Administracion

Marchena ta haya normal cu boticanan ainda ta cobra pa remedinan segun e lista positivo nobo, pasobra no sa exactamente kico ta e palabracion. Particularmente mirando cu a pasa henter un proceso pa saca varios remedi for di e lista cu AZV ta cubri. Ta apenas un luna cu mester a aplica un sistema diferente pa cumpli cu e regla nobo.

“Aruba ta traha cu dos sistema automatisa. Un di e programanan ta lesa e lista di AZV y esey ta bay automatico y mester djis programa e sistema di computer pa lesa e codigonan. E unico problema ta AZV semper ta manda e lista despues (achteraf). Por ehempel, ta na fin di Mei, AZV ta manda e lista di Mei, pues semper ta bin cu cambio despues. Por ehempel e biaha aki a tuma e lista di Maart.” Es mas, boticanan no a ricibi e lista di April, cu ta supuestamente e luna unda tin e cambionan drastico y cu saca hopi remedi for di e cobertura di e seguro general. “E ta zona complica, pero e sistema automatisa ta regula esaki. E otro programa cu ta traha na Aruba ta cu mester haci e cambionan di remedi na man, pues un pa un. Esey ta tuma mas tempo. E ta mas simpel pa haci, pero e ta tuma mas tempo.”

Remedi di April na Mei

E anuncio di Prome Minister riba 29 di April sinembargo a nifica si cu tin pacient cu a entrega nan receta, sea nan mes of via nan dokter na un botica, pero ainda no a haya nan remedi. E pregunta ta kico ta bay pasa cu e grupo aki. Marchena a splica cu e boticanan a palabra cu otro, cu ta bay elimina e recetanan aki y bolbe imprimi nan como receta nobo, pero pa luna di Mei, di forma cu e pacient lo ricibi su remedi sin cu mester paga p’e. “No por haci nada pa esunnan cu a busca nan remedi y a paga p’e, pasobra e decision no ta cu forsa retroactivo,” Heidi Marchena a comenta.

Trabou di lunanan pa yega na un lista

Inspeccion di Remedi, Organo Ehecutivo y boticanan ta entre e instancianan cu a forma un Comision di Conseho pa introduci un lista positivo nobo. Ademas tabatin representacion di specialistanan y dokternan di cas den e comision. “E tempo ey, nos como boticario a trece dilanti cu e lista positivo ta bay trece problema, pero nos no a yega leu. A pusha e lista toch, apesar cu nos como boticario tabata mira cu lo tin complicacion. Y locual nos a bisa ta cu nos por maneh;e bou cierto condicion.”

E reunionnan aki a dura hopi luna y aunke cu boticarionan no tabata mucho contento cu e lista, e hecho cu awor ta hala esaki aden, no ta nifica cu no tin mas trabou. Al contrario, pasobra e tarea cu Minister di Salud Publico a duna ta cu mester bolbe sinta na mesa y bin cu otro sugerencia. “Nos mester bin cu un plan nobo y pa yega na esey, nos lo mester cuminza henter un discusion di nobo.”

Adapta e lista nobo, no cuminza di nobo

Den concepto di Heidi Marchena, su opinion personal, pues no den nomber di boticarionan, ta cu Gobierno mester a mantene e lista cu a negocia y cu a drenta na vigor April 1, y haci cambio den e lista ey. E trabou pa yega na e lista pues tabata haci caba. “Pues no hala e lista completamente aden y cuminza di nobo. Mester a identifica cua aspecto di e lista tabata duna problema y mira con pa soluciona e situacion ey.”

No tur hende por paga

E lista positivo nobo a saca tur pilder pa drumi. Algo cu tabata prescribi na cantidad. Y locual boticanan a ripara ta cu na principio di April, berdad pacientnan a nenga di paga pa e pildernan aki y no tabata cumpra nan. “Na prome instancia, nan a nenga pa paga, pero a ripara cu despues di dos, tres dia, toch nan tabatin pa paga pa e pildernan. Nan tabata pag’e cu dolo si.”

E problema mas grandi tabata cu a stop di tuma remedinan contra dolor di stoma cu tampoco tabata cubri mas pa AZV. “Nan a laga para e remedinan pa stoma. Y si un dokter receta e combinacion di paracetamol y ibuprufen, nan tabata laga e ultimo atras y paga unicamente pa e paracetamol, locual no ta duna alivion necesario pa dolo. Pues tabata mira cu hendenan tabata laga por ehempel gota di wowo atras, pasobra nan no tabata kier a paga p’e.” Segun Marchena, hopi hende cu no tabata paga pa e remedinan aki tabata pasobra “nan no por. Nan mester a haci e escohencia. Nan lo por a haya e gota pa medio di nan specialista, pero e tempo pa warda pa un cita ta mucho largo y mayoria simplemente no tabata por a paga pa e gotanan di wowo,” Marchena a comenta.

Agenda di ehecucion ta forma di comunica

Bon Dia Aruba a tuma contacto cu Inspeccion di Remedi, pero ningun hende tabata contesta e telefon.

Di su banda Emile Vaessen, vocero di Secretario di Estado Demisionario Raymond Knops tabata hopi cortico riba e decision di Gobierno pa elimina e lista positivo di AZV. Manera ta conoci e introduccion di e lista tabata como un di e medidanan pa baha e gastonan di AZV cu 5 miyon florin pa luna. E exigencia aki tabata un di e condicionnan pa Aruba a ricibi e sosten di likidez. Gobierno Hulandes ta den reces e siman aki, pero asina mes Vaessen a bisa cu “nos no ta bay reacciona cada biaha riba un parti chikito di e palabracionnan haci. E agenda di ehecucion ta disponibel riba internet y ta pa medio di e agenda aki nos ta comunica cu Aruba, den un forma habri y transparente,” tabata e comentario di Vaessen.

LEAVE A REPLY

Please enter your comment!
Please enter your name here