Politica riba su mes sa pone politico haci maniobra straƱo. Den tempo di eleccion esey ta bira mas obvio ainda, y den tempo di crisis y eleccion pareu esey ta bira un poco mas acentua ainda. Esey ta e caso cu e baile peculiar cu nos ta mira den e caso di limita gastonan di AZV, cu a bira un di e dolornan mas grandi pa e actual gobierno (demisionario) pero tambe pa e otro partidonan. Nan por wel di critica e coalicion na e momento aki, pero tambe lo mester contesta pregunta ta con nan tabatin pensa pa atende e asunto dificil aki.

En todo caso, esun cu mester dal e promer pasonan semper ta gobierno, y nan a haci esaki tambe. Despues di e acuerdo cu Hulanda cu ta bay corta 5 miyon florin pa luna den AZV, den practica a resulta menos facil pa duna contenido na e acuerdo aki. Pero manera ta semper e posicion di Hulanda den e asuntonan aki, ā€˜acuerdo ta acuerdoā€™ y mester cumpli cune. Asina gobierno a tuma un paso firme cumpliendo cu e acuerdo y a presenta e lista ā€˜positivoā€™ di medicamento cu ta requeri un contribucion di e person sigura. Un forma, no e unico, pa yega na baha gasto di AZV, poniendo e peso semper cerca e persona cu mester haci uso di e servicio medico ey. Pero no a dura mucho, pasobra sorpresivamente diabierna pasa riba ultimo dia di luna, a bin e anuncio di Promer Ministro cu entrante e luna aki no mester paga pa ningun mediacmento mas, pasobra a revoca e lista di remedi pa cual a cobra durante un tempo cortico. E pregunta pakico a yega na revoca e medida ta parce innecesario: e reaccion den campaƱa tabata asina fuerte cu a core revoca, remediando loke por remedia ainda, den sentido di scapa voto mas tanto posible. Esey ta di comprende, pasobra e critica riba e medida ey no a bin di contrincante politico so, sino di e propio base. Fuera di e anuncio sorpresivo no a comenta mas, asina ta cu nos no sa pa cuanto tempo e decision nobo aki ta. E por drenta na vigor atrobe, despues di eleccion, si e partido logra gana eleccion?

E no ta mustra solamente manera un decision impulsa pa consideracion electoral, pero ta yama naturalmente e siguiente pregunta: con ta bay yega na e famoso 5 miyon florin pa luna di austerisacion den AZV, si esaki no ta bin di pasa parti di e gasto di medicamento pa e pacient? Un vistazo riba e cifranan pa 2020 di AZV ta mustra cu a pesar di alrededor di 1.800 persona menos sigura compara cu 2019, e gastonan total pa 2020 tabata Afl. 448,9 miyon, como 4,9 miyon mas cu na 2019. Cu esey, mescos na 2019, nos a yega na e nivel di por lo menos 4.000 florin pa persona na gasto medico, y sin un reduccion na vista, pasobra nos ta hayando mas y mas hende di edad (riba 65 aƱa), cu tin como promedio mas gasto medico cu e grupo mas hoben; pues un tendencia di aumento.

Pero tin mas di conta den e asunto aki. Por ehemplo, cu a pesar di e medida di 5 miyon florin pa luna, gobierno mester a pomp 99 miyon florin den caha di AZV pa mantene e fondo capaz di cumpli cu su compromisonan financiero. Esaki naturalmente tin su causa den e pandemia, unda na prima di empleado y empresanan AZV a cobra 41 miyon florin menos, y casi 72 miyon menos na contribucion via BAZV, a base di menos benta den henter economia. Con a financia esey anto, si gobierno tabatin centenares di miyones menos na entrada aƱa pasa? Esey ta parti di e placa cu a fia pa mantene gobernacion y economia riba pia. Esey nos tur ta bay paga, algun dia, cualkier gobierno cu lo tā€™ey. Anto, si tin algun politico cu ta kere cu e sa, laga e conta con ta sali di e asunto aki, sin cu nos ta haya e factura presenta. Loke e pueblo votador mester corda cu na final di tur cos gobierno no tin cartera, ta nos tin. Bon analisa anto, si no a austerisa nada den AZV, lo mester a fia mas placa ainda pa mantene AZV solvente.

Nos por imagina cu lo tin hende cu ta bisa cu nan ta prefera pa gobierno haci mas debe, na lugar di bin cu medida cu ta conta pa hende cu por paga esaki masha bon, pero tambe ta dal esnan cu no por afford paga e gastonan extra aki. Esey ta parce mas elegante, sigur pa e gruponan menos pudiente, pero manera bisa caba, finalmente ta mas debe cu mester paga tambe, solamente cu bo no ta mirā€™e, pasobra na botica o docter nan no ta cobra bo nada… Esey basicamente ta wega di avestruz, di hinca cabez den santo pa no mira e realidad. Y e realidad ey ta cu gasto medico, di tur manera, ta keda un di nos dolornan di cabez mas grandi, independientemente di ken ta sinta ey como ministro di salubridad publico. Si bisa cu no ta cobra bo nada, servico medicio full gratis, sea sigur cu na otro banda bo ta pagā€™e, anto bon caro tambe.

LEAVE A REPLY

Please enter your comment!
Please enter your name here