Nos a keda sumamente sorprendi cu e campaña publicitario cu e ex-promer ministro y, si nos no ta hera, asesor di e actual gabinete, a entama den ultimo dianan. Nos medio mes a publica un articulo diasabra pasa skirbi pa e persona aki, unda e no a laga ningun duda kico e ta pensa di e condicionnan cu Hulanda a pone pa nos haya ayudo den e situacion critico cu nos ta aden.

E opinion no ta cuadra at all cu loke nos ta mantene como medio den esaki, pero cumpliendo cu libertad di expresion nos a publica esaki. Sin embargo, nos no por keda sin comenta riba e remetido aki, pasobra e ta duna un imagen, segun nos opinion, bastante troci di nos historia, cu pa loke ta Hulanda, ta bay back casi 400 aña. Den e siglonan ey a pasa hopi cos, bon y malo, y ningun di nos cu t’ey awendia tabata participe den loke a haci y dicidi tanto tempo atras. Den e remetido ta centra e ataque riba Hulanda y e Hulandesnan riba e supuesto ‘recolonisacion’ cu ta tumando lugar. Esey ta un manera di contempla e asunto aki; pero tin otro.

Na nos manera di mira e asunto, loke a pasa ta cu nos, mescos e otro islanan, tabata desea di no ta colonia mas. Na Hulanda tambe e manera di pensa a cambia y a resulta den un acuerdo, cu nos ta keda parti di Reino Hulandes, y cu un propio gobierno autonomo. Importante tabata cu den añanan cincuenta di siglo pasa tabata e deseo expreso di e ciudadano, den gran mayoria, pa keda forma parti di Reino Hulandes. A cumpli pues cu voluntad di pueblo, cu segun nos pa tur nos politiconan, al menos esey nan ta bisa, ta algo sagrado. Den un berdadero democracia mester ta asina tambe. Loke a crea bao di Statuut ta e garantia cu e ciudadano Hulandes riba e islanan tin bon gobernacion, como un capa supervisor riba e gobierno(nan) autonomo di Antiyas y di e islanan na nivel insular. Y pakico esey tabata? Pasobra no tabatin garantia cu e gobierno autonomo ey ta bay mantene su mes na tur regla di bon gobernacion y cu mester tin un nivel mas halto cu por interveni. Claro cu desde e promer momento nos politiconan a haya esaki un estorbo, pero tabata dificil pa nan bisa cu nan no kier esey, pasobra inmediatamente Hulanda lo bisa cu “bo por bira independiente tambe”. Tur politico riba e islanan aki cu dos placa di sinti sa cu hamas e poblacion di e islanan aki lo laga nan paspoort Hulandes bay. Ademas, siendo ciudadano Hulandes semper nan tin derecho riba gobernacion drechi y na hopi ocasion por bisa cu e Hulandesnan tabata hopi dejado den interveni na fabor di nos como ciudadano Hulandes. Pues na nos modo di mira e asunto, Hulanda no mester interveni pasobra nan tin gana di ‘mete den asunto di otro’ manera un parti di nos politiconan kier laga nos kere, pero nan mester hacie pasobra nan mester duna proteccion na nos derechonan como ciudadano Hulandes.

Y pa nos yega na e situacion cu nos tin awendia, tuma desde nos Status Aparte na 1986: kico esaki ta mustra? Nos tabatin un serie di gobierno malo, un mas cu otro, unda corupcion, patronahe politico y nepotismo a hiba nos na rand di bancarota, y pa corona obra nos a bin haya como cherry riba e bolo e actual crisis di coronavirus… Anto ta kico e apreciable ex-ministro y asesor gubernamental ta kere cu nan mester a haci? Den estilo di Sinterklaas laga algo atras den su sapato cu convenientemente el a pone dilanti porta? Y talvez laga un carta atras den cual ta desea nos hopi exito cu e suma biyonario ey? Bo ta laga hende cu conhuntamente a ocasiona un debe di mas di 6.000 miyon florin cu un saco di placa, sin condicion? Manera nan ta bisa na Hulandes, nan “no ta gekke Henkie’. Y claro cu nan tin gran razon pasobra nan no mester wak interes di e politico, sino di e pueblo. Y claro cu e cosnan cu nan ta propone pa haci den e proximo añanan ta cay duro pa cualkier politico, pasobra e wega di semper a caba, en todo caso, esey nos ta spera.

Ademas, nos no ta comprende e yoradera aki, pasobra loke ta propone ta loke tur hende cu kier mira gobernacion drechi den nan pais, lo desea. Y pa logra yega na gobernacion drechi tin yen di paso pa tuma cu di tur manera practicamente ningun politico kier tuma. E mihor ilustracion di esaki ta e avalancha di ataque contra e actual ministro di Infrastructura, pasobra el a kibra e codigo di honor di e Cosa Nostra cu ta existi, unda promer cu interes general, ta bay interes di famia, amigo y sponsor di partido. Nos ta y nos ta keda ciudadano Hulandes y Arubiano, y den ambos calidad nos mester insisti loke pa 34 aña caba nos propio politiconan no por a duna nos: gobernacion drechi, cu trato igual y bon servicio pa nos tur. Y esey no ta bin di mes pasobra e Hulandesnan lo ta aki; ta nos mes mester hacie.