E no ta e prome esposo pa haya sa cu su esposa ta namora di Brad Pitt, pero Roland Mary por ta e prome homber cu ta duna su bendicion na e aventura di su esposa cu e galan di Hollywood.
Despues cu e modelo Aleman di 27 aña, Nicol Poturalski a wordo vincula na Pitt siman pasa, pronto a revela cu e ta casa cu e tata di su yiu homber, un empresario gastronomico di 68 aña di edad, pa ocho aña caba. Ta bisa cu nan tin un ‘matrimonio habri’ y cu hasta e por a conoce Pitt, di 56 aña, na e restaurant di su esposo, e luhoso Borchardt di Berlin.
Mary a keda keto tocante e relacion di su esposa cu Pitt. Sinembargo, segun reportenan, un amigo anonimo a papia cu Daily Mail: “Roland ta un persona hopi filosofico. E tabata casa varios biaha y tin cinco yiu. E no ta interesa den negatividad di jaloezie. Ainda nan ta casa, pero por defini nan relacion como ‘un matrimonio habri’.”
Esey por splica pakico e empresario a keda keto mientras su esposa ta celebrando un relacion publico cu Pitt.
Diaranson a saca potret di Poturalski cu Pitt yegando na aeropuerto Le Castellet, cerca di Marsailles den sur di Francia, den e jet priva di Pitt. Despues nan a bay Chateau Miraval, un finca di 60 miyon dollar unda e actor a casa cu su segundo esposa, Angelina Jolie, y cu a ex-pareha ainda ta comparti.
Poturalski, di origen Polaco y conoci profesionalmente como Nico Mary, a publica varios potret cu mensahe enigmatico riba Instagram, cu su siguidonan desde maart a nota pista di un homber misterioso.
November ultimo, tres luna despues di aparentemente a conoce Pitt na e restaurant di su casa, Poturalski a comparti potret di un biahe di seis siman na Los Angeles, incluyendo bishita na e beachnan di Malibu y Santa Monica. E biahe a culmina cu un concierto di e rapper Kanye West na Hollywood cu Pitt.
Si confirma e relacion, cual representantenan di Pitt a nenga di comenta, e modelo lo ta e prome pareha oficial di Pitt desde cu el a separa di Jolie na 2016.
