Muchanan homber na Hulanda lo ricibi vacuna contra virus VPH cu ta causa cancer, for di 2021, segun gobierno a anuncia.
Siguiendo advies di e Conseho di Salud di Hulanda, e pais lo extende su programa di vacunacion na tur mucha y reduci e edad di vacunacion na 9 aña di edad.
Cada aña, ta calcula cu mil hende muhe y 500 homber ta haya cancer a traves di cepanan di e virus, incluyendo cancer na boca di matriz. Cada aña, segun NOS, mas di 300 hende muhe y 200 homber ta muri pa malesa relaciona. Ta calcula cu cuater den cinco persona a wordo infecta cu VPH, cual tambe ta causa fret genital, y maske mayoria di infeccion ta cura naturalmente, algun di nan ta conduci na cancer.
Paul Blokhuis, di ministerio di Salud, a bisa den un sesion di informacion pa parlamento cu vacunacion di ambos genero – manera ta haci actualmente den otro paisnan – lo duna miho proteccion contra e malesa. “Muchanan homber e ora ey lo ta protegi contra e virus y core menos riesgo di malesnan teribel”, el a bisa. “Mas cu tur cos, inmunidad di grupo lo protege muchanan homber y muhe miho.”
Muchanan muhe ta ricibiendo e vacuna desde aña 2010, y 65% di esunnan naci na 2006 a ricibi nan prome vacunacion, segun cifranan di gobierno. Sinembargo, den añanan recien a lanta preocupacion ora cu e porcentahe di vacunacion a cay for di 61% na 2014, pa 45.5% na 2016.
A pesar cu cuerponan di salud prome a papia tocante duna ‘proteccion indirecto’ pa muchanan homber door di vacuna muchanan muhe, no ta cla pakico no a ofrece e vacunacion na ambos sexo for di cuminsamento. Infeccion di VPH por pasa a traves di cualkier contacto di cuero pa cuero, y e vacuna ta mas efectivo si ta administra na un edad prome cu e persona bira sexualmente activo.
