Hulanda na caminda pa construi casi 100.000 cas nobo na 2027; Pero segun experto, e crecemento probablemente ta temporal

(NLTimes) – Hulanda ta na caminda pa agrega casi 100.000 cas nobo na 2027, segun un estudio encarga door di ministerio di Vivienda. Sinembargo, investigadornan ta adverti cu e aumento den construccion probablemente lo ta temporal y cu despues di 2027 e ritmo lo baha atrobe.

E firma di investigacion ABF Research ta proyecta cu 99.700 cas nobo lo ser completa na 2027, loke ta pone Hulanda casi na e meta di largo plaso di gobierno pa agrega 100.000 cas pa aña. Pa 2026, e pronostico ta apunta na aproximadamente 91.000 cas nobo. E calculacionnan tambe ta inclui cerca di 10.000 demolicion di cas pa aña.

E pronosticonan ta basa riba un aumento significativo den cantidad di permiso di construccion cu a ser entrega desde october 2023. Segun ABF, normalmente ta tuma alrededor di 27 luna entre aprobacion di un permiso y entrega di e cas cla. Esaki ta nifica cu e permisonan aproba recientemente probablemente lo resulta den un aumento di construccion durante 2026 y 2027.

Minister di Vivienda Elanor Boekholt-O’Sullivan di D66 a yama e pronosticonan un desaroyo positivo. Segun e mandatario, awor ta importante pa sigui cu e trabaonan te cu e metanan bira realidad, pasobra e ultimo fase di un proyecto ta hopi biaha esun mas dificil.

E estudio, cu a ser financia door di e ministerio, tambe ta inclui casnan crea door di dividi apartamento grandi den unidadnan mas chikito y door di transforma edificionan di oficina den casnan pa biba. E tipo di proyecto aki no semper ta inclui den e cifranan oficial di Oficina Central di Estadistica (CBS), loke ta splica pakico e total di e estudio ta mas halto.

Aunke e perspectiva pa corto plaso ta positivo, ABF ta spera cu e crecemento lo perde forsa despues di 2027. Esaki ta relaciona cu un bahada den cantidad di permiso di construccion cu ta ser entrega desde 2025 y cu e aumento di interes bancario, cu ta limita capacidad di inversion den e sector di vivienda.

Compara cu e rapport di aña pasa, e expectativa actual a ser revisa pa subi. Un motibo importante ta cu gobierno finalmente no a sigui cu e propuesta pa vries huur. Segun e investigadornan, e decision aki ta permiti corporacionnan di vivienda conserva mas capital pa inverti den proyectonan nobo di construccion.

Sinembargo, ABF ta subraya cu ainda tin diferente obstaculo structural. Entre nan tin e reglanan di nitrogeno, congestion riba e red electrico y limitacionnan pa construccion den cercania di cunucunan di cabrito. Actualmente, e investigadornan ta considera cu e factornan aki ta representa solamente un obstaculo limita, pero nan mes ta reconoce cu e suposicion ey por resulta demasiado optimista.

A pesar di e crecemento proyecta, e escasez di cas na Hulanda ta keda un problema serio. E escasez di vivienda lo baha un poco di 4.8% na 2025 pa 4.6% na 2026, principalmente pasobra e crecemento di poblacion a resulta mas abao cu loke tabata spera. Asina mes, Hulanda ainda tin un escasez di aproximadamente 384.000 cas.

Pa logra e meta di gobierno di un tasa di disponibilidad di cas di 2%, lo mester construi inmediatamente rond di 213.000 cas adicional. Segun e pronosticonan actual, e obhetivo ey probablemente no lo ser alcansa prome cu 2041.