Conseho di minister di Reino lo emiti instruccionnan (aanwijzing) nobo pa e isla diabierna proximo exigi pone nan maneho financiero den orden y pa balansa e presupuesto di gobierno.

Tin deficitnan enorme den e presupuesto. Den pasado gobierno di Corsou no a sigui Consehonan cu e organo di supervision (CFT) a emiti, por lo menos suficientemente. Gobierno a tuma stapnan significativo pero esaki no tabata suficiente pa preveni cu presupuesto di 2019 lo yega na un deficit tambe.

Deficit total di 140 miyon Euro pa ultimo 3 aña
Esaki ta e di 3 aña cu Corsou no ta cumpli cu e norma stipula den ley, cual tabata un acuerdo cu a bin na dje den 2010 pa por yega na sanacion di e debe nacional. Pa e mesun rason di no cumplimento gobierno di Gerrit Schotte a haya un aanwijzing den 2012.

En total gobierno di Corsou ta yega na un deficit di 140 miyon Euro den e ultimo 3 añanan. Ademas e porcentahe di debe compara cu e GDP (producto nacional bruto) a subi te na 46%. Esaki ta surpasa e nivel controlabel di 40%. Tambe e posicion di likidacion a baha te surpasa un nivel cu por ta controlabel.

College financieel toezicht ta premira varios riesgo relaciona cu esaki y ta considera cu medidanan adicion lo ta necesario pa asina structuralmente por cumpli cu e normanan stipula den e ley di Reino riba supervision financiero (Rijkswet financieel toezicht) den añanan venidero.

Impuesto
Desde 2016 CFT ta consehando pa tene cuenta cu e entradanan di impuesto ta bahando, mencionando cu mester tene na cuenta cu e entradanan den caha di gobierno cu no ta genera pa impuesto tambe ta canando atras.

Entre otro e ganashi genera pa impuesto y ganashi genera pa servicio y producto ta bahando, compara cu e presupuesto, cual su gastonan a sali mas halto di loke tabata presupuesta.

Aanwijzing
Corsou lo mester compensa pa un deficit di 61 miyon Euro den aña actual 2019, ademas di un deficit di 85 miyon Euro den 2017 y 2018, cubriendo tur esaki cu un surplus den añanan 2020, 2021 y 2022. Ademas di e situacion relevante na gobierno su propio presupuesto, lo mester percura pa clear e debenan cu a acumula entre gobierno y Pensioenfonds APC y e seguro medico nacional SVB riba 31 di december 2022.

Apart di esaki Corsou lo mester introduci lo mas tarda pa 1 di januari 2020 un reforma fiscal cu lo ta neutral riba presupuesto, tambe lo mester introduci un impuesto pa gastonan general. Gobierno lo mester tuma medidanan pa sigura cu e productividad lo hisa, tanto bou gobierno mes como companianan estatal. Gastonan di personal mester baha den proximo añanan, salarionan di funcionarionan publico mester keda vries. Si ta resta sumanan despues di compensa pa e deficitnan, e placa ey nan lo mester inverti den crecemento economico y enseñansa, entre otro.

 

LEAVE A REPLY

Please enter your comment!
Please enter your name here