Hulanda ta prohibi terapia di conversion pa homosexualnan despues cu Eerste Kamer a aproba ley nobo

(NLTimes) – Hulanda lo prohibi e asina yama “terapia di conversion” pa homosexualnan, despues cu Eerste Kamer a aproba un ley presenta pa D66, VVD, PRO, SP y Partij voor de Dieren. E ley ta prohibi intento pa cambia orientacion sexual di un persona mediante terapia.

Partidarionan di e ley ta argumenta cu e practicanan aki por causa daño serio. Nan ta señala na estudio cientifico cu ta mustra un relacion cu depresion, problema di salud mental, problema social y, den algun caso, pensamento suicida of intento di suicidio.

Algun metodo cu tin como obhetivo cambia of suprimi orientacion sexual of identidad di genero di un persona ya tabata prohibi, incluyendo practicanan manera terapia electrico y uso di medicamento. Iniciadornan di e propuesta ta argumenta cu e ley penal actual no ta cubri completamente tur forma dañino di practicanan di conversion.

Durante e debate parlamentario, senador Peter Nicolaï di Partij voor de Dieren a menciona ehempelnan manera presion psicologico prolonga, sesionnan pseudo-terapeutico, sanacion basa riba oracion y exorcismo, particularmente ora nan ta ser aplica den relacionnan di dependencia.

E legislacion nobo ta prohibi terapia di conversion ora esaki ta enfoca riba menor di edad of adulto den situacion vulnerable. Cualkier persona cu viola e ley por enfrenta boet te na 27.500 euro of un condena di prison di te na dos aña.

Profesionalnan cu ta involucra den e asina yama practicanan di “conversion” por perde nan derecho pa eherce nan profesion tambe. Lo prohibi tambe ofrece of haci publicidad pa terapia di e tipo aki.

COC Nederland a celebra e prohibicion, describiendo esaki manera un paso grandi dilanti. Presidente Myrtille Danse a bisa cu e ley ta brinda e husticia cu tabata ser spera pa hopi persona cu por sufri daño permanente como resultado di practicanan di conversion. El a agrega cu e idea cu orientacion sexual di un persona por ser cambia of “cura” no ta basa riba realidad. “Bo ta bon manera bo ta,” el a declara.

E propuesta di ley a pasa Eerste Kamer cu un mayoria amplio: 57 di e 75 miembronan a vota na fabor durante un votacion registra. D66 y VVD, e partidonan tras di e iniciativa, a aplaudi e aprobacion di Eerste Kamer. “Cu aprobacion di Eerste Kamer, añanan di compromiso cu libertad, igualdad y dignidad humano a ser recompensa,” e partidonan a skirbi.

Criticonan ta argumenta cu no ta cla con e propuesta ta agrega algo nobo na e prohibicionnan cu ya ta existi. Nan tambe ta adverti cu e ley por pone demasiado restriccion riba profesionalnan di cuido y cu esaki por afecta libertad di religion.

Anteriormente, senador Peter Schalk di SGP a expresa preocupacion cu profesionalnan manera psicologo, dokter, maestro, pastor y hasta mayornan por enfrenta boet of sentencia di prison si nan no confirma inmediatamente loke el a describi manera “sentimentonan confuso” di muchanan.