Hulanda ta prohibiendo vuelonan for di Reino Uni pa sikiera resto di aña den un intento pa sigura cu un cepa nobo di coronavirus cu ta pasando door di sur di Inglatera no yega su costanan.
E prohibicion a drenta na vigor ayera mainta, y gobierno a bisa cu tabata reaccionando na medidanan mas fuerte cu prome minister Britanico, Boris Johnson a impone na London y e areanan su alrededor. Hulanda a bisa cu lo evalua ‘cu otro paisnan di Union Europeo e posibilidadnan pa contene e importacion di e virus for di Reino Uni’.
Johnson a bisa cu un variante nobo di e virus, cu ta move mas lihe y ta 70% mas transmisibel cu e cepanan existente, ta parce di ta dunando impulso na e transmision rapido di infeccionnan nobo na London y sur di Inglatera.
“No tin evidencia pa sugeri cu ta mas mortal of ta causa malesa mas severo”, e prome minister a enfatisa, of cu vacunanan lo ta menos eficiente contra e cepa en cuestion.
Gobierno Hulandes ya ta consehando fuertemente pa su ciudadanonan no biaha a menos cu ta absolutamente necesario.
No tabatin comentario inmediato riba kico gobierno Hulandes tin intencion di haci pa cu e ferrynan cu ta biaha entre Reino Uni y Hulanda.
Reino Uni a alerta Organisacion Mundial di Salud (WHO) cu e cepa nobo identifica e siman aki ta parce di ta acelerando e transmision di Covid-19, bisando cu a conta pa alrededor di 60 porciento di e casonan den e capital.
Virusnan ta muta regularmente, y cientificonan a haya miles di mutacion diferente entre muestranan di e virus causando Covid-19. Pero hopi di e cambionan aki no tin efecto riba con facil e virus ta transmiti of con severo e sintomanan ta.
Reino Uni a mira mas di 67mil morto den e pandemia, e di dos cantidad confirma mas halto na Europa, tras di Italia. Hulanda a registra mas di 10,500 morto relaciona cu e virus.
