Hulanda ta reconoce cu cuido forensico den parti Caribense di Reino no ta suficiente y ta trece riesgo

Secretario di Estado di Husticia y Seguridad di Hulanda, Claudia van Bruggen, a reconoce cu e posibilidadnan actual pa ofrece tratamento psikiatrico forensico den e parti Caribense di Reino Hulandes no ta suficiente y cu esaki ta trece riesgo.

Den un carta fecha 16 di october 2026, dirigi na Eerste Kamer, e Secretario di Estado a contesta varios pregunta parlamentario tocante aplicacion di medida di TBS, disponibilidad di tratamento specialisa y responsabilidad di e diferente paisnan den Reino. Aruba ta ser menciona directamente, pasobra su legislacion penal ta permiti imposicion di TBS, pero ehecucion di e medida ainda ta enfrenta diferente desafio.

E carta ta un reaccion riba preguntanan presenta door di Pim Walenkmp di Fractie-Walenkamp, relaciona cu e situacion di personanan cu a comete un delito y cu, debi na problema psikiatrico, por tin necesidad di tratamento specialisa. E preguntanan ta enfoca riba e diferencia entre loke legislacion ta permiti y e posibilidadnan practico pa ehecuta e medidanan aki den e islanan Caribense.

TBS, conoci na Hulanda manera “terbeschikkingstelling”, ta un medida penal cu hues por impone den cierto caso na persona cu a comete un delito y cu tin un trastorno mental. E medida por inclui tratamento psikiatrico y supervision, cu e intencion di reduci riesgo di bolbe comete delito y proteha sociedad.

Den su respuesta, Secretario di Estado Van Bruggen ta aclaria cu tanto Aruba como Corsou tin legislacion cu ta permiti hues impone TBS y cu e medida efectivamente ta ser aplica. Sinembargo, e ta confirma cu ehecucion di TBS ta presenta diferente dificultad, particularmente relaciona cu disponibilidad di cuido y tratamento adecuado.

E situacion legal no ta mescos den tur parti di Reino. Na Sint Maarten, legislacion vigente no ta permiti imposicion di TBS, mientras cu na Boniero, Sint Eustatius y Saba, e medida ainda no por ser aplica. Pa e tres islanan aki, un adaptacion legal a ser publica desde 2010, pero nunca a drenta na vigor, pasobra e facilidadnan necesario pa ehecuta TBS di forma responsabel no tabata prepara.

Un di e puntonan mas importante den e respuesta ta e reconocemento cu, aunke tin posibilidadnan di tratamento forensico den e parti Caribense di Reino, e oferta actual mester ser mehora. Segun e Secretario di Estado, e capacidad existente no ta suficiente y esaki ta crea riesgo no desea.

E declaracion ta relaciona cu preocupacionnan expresa den Eerste Kamer tocante e posibilidad cu persona cu problema psikiatrico serio, despues di comete un delito grave, por sali for di prison sin cu el a ricibi tratamento adecuado. E parlamentario tambe a menciona riesgo di bolbe comete un delito y consecuencianan pa seguridad publico, famia y victimanan.

Sinembargo, Secretario di Estado Van Bruggen no ta confirma tur e suposicionnan presenta. E ta splica cu no por confirma cu huesnan a opta pa otro tipo di castigo den casonan cu TBS lo por tabata mas adecuado, pasobra ta e hues tin e responsabilidad di determina cua castigo of medida mester ser aplica den cada caso.

No obstante, e ta reconoce cu e deficiencianan existente ta motibo pa sigui fortalece cuido forensico mediante cooperacion entre e paisnan di Reino.

Otro punto importante den e carta ta e distribucion di responsabilidad entre Hulanda y e paisnan autonomo. E Secretario di Estado ta enfatisa cu Aruba, Corsou y Sint Maarten tin nan propio responsabilidad pa imposicion y ehecucion di castigo y medida penal, incluyendo TBS.

Esaki ta nifica cu Gobierno di Aruba mes ta responsabel pa disponibilidad y organisacion di cuido forensico adecuado dentro di su sistema di husticia. E responsabilidad directo di Ministerio di Husticia y Seguridad Hulandes ta limita na Boneiro, Sint Eustatius y Saba.

Sinembargo, e diferencia den responsabilidad no ta exclui cooperacion. Van Bruggen ta indica cu e paisnan di Reino ta sigui yuda otro pa fortalece e facilidadnan di tratamento forensico. Netamente e escala chikito di e islanan ta haci cooperacion regional necesario.

Pa enfrenta e limitacionnan existente, e paisnan di Reino ta participa den un programa di varios aña enfoca riba cuido y tratamento forensico, TBS y PIJ, un medida relaciona cu tratamento di hoben cu a comete delito.

E programa ta contempla un plan general pa henter Reino y plannan specifico pa cada pais. E ekiponan di proyecto local mester identifica prioridadnan y evalua con diferente parti di e sistema di husticia por traha hunto pa mehora tratamento y ehecucion di medidanan penal.

Hulanda ta pone recurso financiero, conocemento specialisa y sosten disponibel durante un periodo di cuatro te cinco aña pa e gerente di programa y e parti di e programa cu ta cubri henter Reino. Ademas, Hulanda ta financia e ekipo local di proyecto pa Caribe Hulandes.

Segun e carta, e gerente di programa pa henter Reino a ser nombra na april 2026. Desde e momento ey, diferente actividad a cuminsa, incluyendo capacitacion relaciona cu preparacion di rapportnan psikiatrico y psicologico.

E programa ta forma un punto permanente riba agenda di Justitieel Vierpartijenoverleg, e reunion entre e ministernan di Husticia di Aruba, Corsou, Sint Maarten y Hulanda. Den e reunionnan aki, e paisnan ta sigui progreso di e programa, ta haci acuerdo y ta evalua nan implementacion.

Secretario di Estado Van Bruggen tambe a aborda e necesidad di cuido forensico cu un nivel halto di seguridad. Segun Van Bruggen, un clinica di TBS similar na esnan existente na Hulanda probablemente no ta factibel den e parti Caribense di Reino, debi na e escala chikito di e region.

P’esey, e programa di varios aña ta investiga otro solucionnan cu ta mas adapta na e realidad di e islanan. E carta no ta indica ainda cua modelo concreto lo ser adopta, unda eventual facilidadnan lo ser situa, ni cuanto capacidad adicional lo ta necesario pa cada pais.

E plannan specifico pa cada pais lo mester duna mas claridad tocante e prioridadnan y e solucionnan cu por ser implementa.

Den e preguntanan parlamentario tambe a pidi informacion tocante cuanto persona condena na TBS ta warda tratamento y cuanto tempo nan ta wardando caba.

Van Bruggen a indica cu e no por ofrece un contesta completo pa e paisnan autonomo, pasobra esaki ta un asunto cu ta cay bao responsabilidad di cada pais. Consecuentemente, e carta no ta presenta cifra specifico pa Aruba tocante cantidad di persona cu ta warda tratamento di TBS.

E Secretario di Estado tampoco por a indica cuanto sospechoso of persona condena den Caribe lo por a ricibi TBS bao circunstancianan ideal. Segun su splicacion, e decision pa impone un castigo of medida ta depende di evaluacion individual di e hues.

Pa Hulanda, e carta ta menciona cu aproximadamente 270 persona ta warda den un institucion penitenciario pa cuminsa tratamento den un clinica di TBS. E cifra aki no ta inclui Aruba ni e otro islanan Caribense.

E carta ta haci referencia tambe na e sentencia di Corte Europeo pa Derechonan Humano den caso Murray, di 26 di april 2016. Den e caso ey, Reino Hulandes a ser condena debi na falta di tratamento psikiatrico forensico adecuado y perspectiva di rehabilitacion pa un persona condena na prison pa bida largo cu tabata sufri di un trastorno mental.

E sentencia a establece cu e situacion tabata representa un violacion di articulo 3 di Convenio Europeo pa Derechonan Humano, cu ta prohibi tratamento of castigo inhumano of degradante.

Secretario di Estado Van Bruggen a confirma cu Reino Hulandes a entrega un plan di accion nobo na Comite di Ministernan di Conseho di Europa dia 30 di september 2026, como parti di e siguimento di e sentencia. E documento ta describi e medidanan cu ta ser tuma y, segun e carta, lo ser publica door di e comite.

Pa Aruba, e contesta di e Secretario di Estado ta confirma cu posibilidad legal pa impone TBS ta existi, pero cu ehecucion y disponibilidad di tratamento adecuado ainda ta presenta desafio. E documento no ta ofrece un inventario specifico di capacidad actual na Aruba, cantidad di pashent cu tin mester di tratamento, ni un fecha concreto pa introduci facilidadnan adicional.

E siguiente stap importante ta elaboracion di e plannan specifico pa cada pais dentro di e programa di varios aña. E proceso aki lo mester duna mas claridad tocante cua mehoracion ta necesario, con cooperacion regional lo funciona y cua recurso lo ser destina na implementacion.

Secretario di Estado Van Bruggen a indica cu Parlamento Hulandes ta ser informa regularmente tocante progreso di e programa y cu un carta di siguimento di e ultimo Justitieel Vierpartijenoverleg di september lo ser comparti durante october.

E respuesta parlamentario ta confirma necesidad di mehora cuido psikiatrico forensico den e parti Caribense di Reino, mientras cu pa Aruba ainda ta keda pendiente con e cooperacion y e plannan nacional lo resulta den mas posibilidad concreto di tratamento, supervision y proteccion di seguridad publico.