For di proteccion di podernan manera China y Rusia te na medio ambiente, segun Colegio di Consulta.

Hulanda mester enfoca mas riba derecho humano y desaroyo sostenibel

Parlamentarionan, expertonan huridico y representantenan di organisacionnan di derecho humano a urgi mas participacion di Gobierno Hulandes pa mehoracion di derechonan humano riba e islanan Caribense di Reino Hulandes. Den su rapport di September 10, 2020, e Colegio di Conseho pa Relacionnan Exterior di Hulanda, AIV (Adviesraad Internationale Vraagstukken)

a duna un vision amplio riba e papel di Reino pa eleva seguridad y bienestar di ciudadanonan di Reino Hulandes den Caribe.

Derechonan Humano

Reino te ainda no ta cumpli cu hopi di e normanan di derecho humano cu ta internacionalmente accepta, en particular riba (e supervision) proceduranan di asilo. Y ta acepta demasiado largo cu e condicionnan pa detencion ta bou nivel. Tambe ta haya notificacion di cosnan robes ora ta repatria Venezolanonan. Segun AIV, e ta crucial pa introduci mehoracion awor aki, netamente pa motibo di un crisis continuo na Venezuela.

Gobierno di Hulanda ta consciente di esaki, pero ta enfatisa cu ta e paisnan CAS mes ta e promenan yama pa percura cu ta realisa un nivel adecuado di proteccion di derechonan humano. Hulanda ta prefera pa sigui e rumbo pa coopera y sosten, ora cu tin problema. Hulanda ta considera e funcion di garantia di Reino, basa riba articulo 43, inciso 2 di Statuut como ultimo recurso. AIV sinembargo ta di opinion cu e acercamento awor ta demasiado marginal y cu mester percura cu ta extende e tarea di garantia pa traha riba prevencion pa evita desaster despues.

Cambio di Clima

Pa loke ta cambio di clima, varios di e islanan ta vulnerabel pa extremo. E tres islanan St. Maarten, Saba y St. Eustatius ta mas vulnerabel pa horcannan mas intenso. St. Maarten te ainda no por a recupera di e devastacion ocasiona pa horcan Irma. Pero tur e seis (6) islanan lo confronta efectonan dañino di cambio di clima, cu por nifica scarsedad di cuminda, inundacion y degradacion di medio ambiente y ecologia maritimo. Como tal, e paisnan den Caribe mester di sosten di Hulanda pa proteccion di naturalesa, diversificacion di economia y maneho di awa. Hulanda mester tene cuenta ademas, cu su militarnan mas y mas lo haya peticion pa duna e prome auxilio.

Rivalidad di podernan global y Venezuela

Latino America y Caribe a bira e scenario pa rivalidad entre podernan grandi. Merca ta preocupa riba e influencia creciente di China y Rusia. Merca ta mas dominante, pero lo mester inverti mas pa cooperacion regional y desaroyo pa evita cu paisnan ta busca yudansa cerca otro. Rusia a logra revitalisa lealtadnan durante ultimo dos decada y ta traha na nivel militar cu Cuba, Nicaragua, Venezuela y Peru. E presencia fuerte di China lo bira un reto grandi. China a logra mara diferente pais economicamente y politicamente na dje pa medio di inversionnan y acuerdonan comercial. Te ainda no tin presencia militar Chines den region, pero locual si ta preocupante ta e hecho cu China ta entrega technologia di supervision digital na Gobiernonan u no ta respeta principionan di estado di derecho. Tin suficiente motibo pa analisa e interes Chines den region y tambe e parti Caribense den Reino, y no solamente for di e punto di bista economico. Dependencia di Beijing ta un menasa grandi pa libertad y seguridad di habitantenan. E paisnan di Reino por para fuerte si nan ta actua a base di un vision comparti riba e risico di un influencia di China cu ta birando mas grandi.

E desaroyonan preocupante na y rond Venezuela tin influencia grandi riba Corsou y Aruba. Tin un populacion grandi di Venezolanonan cu ta ilegal riba e islanan. Segun calculacion, nan ta como 15 porciento di e populacion y un gran parti di nan ta den situacionnan vulnerabel. Di otro banda, na Aruba tin un aumento claro di inversionnan Venezolano den companianan y tereno/edificionan, y no ta cla di unda nan placa ta bin. Y na Corsou, e futuro di refineria, igual cu e almacenamento di petroleo di Venezuela ta insigur. Esaki ta pone presion pa bin cu plannan alternativo pa desaroyo di e tereno rond di e refineria y terminal.

E islanan ABC lo mester enfoca mas riba relacionnan di comercio cu otro paisnan den region. Reino lo mester tene cuenta cu e situacion humanitario di Venezuela lo sigui empeora y cu e estado mes lo cay den otro, entre otro door di e pandemia. Y como tal, Hulanda mester constata cu su pasonan pa hisa e presion riba e regimen di Maduro lo tin repercusion pa e stabilidad di e islanan ABC.

Reino

Compromiso renoba den region Caribense tin implicacion pa partnernan den Reino y pa e cooperacion interdepartamental na Den Haag. Pero tambe pa e posicion internacional, ora ta trata di iniciativanan den e cuadro multilateral y bilateral cu paisnan partner den regio y tambe aliadonan. E boluntad politico pa tuma mas responsabilidad tabata poco pa hopi tempo, ya cu e ta rekeri esfuerso adicional di Hulanda y ta bay man den man cu risiconan pa motibo di relacionnan complica cu e diferente Gobiernonan di e paisnan den Caribe y nan propio base politico.

Ta parce cu ta uza e sensibilidadnan post colonial y interpretacionnan limita di e Statuut cu a keda cambia ultimo na 2010 como motibo pa tapa e falta di boluntad politico aki.

E forma di tuma decision den Conseho di Minister di Reino ta tene mucho poco cuenta cu e deseonan di e ciudadanonan riba e islanan cu ta cansa di corupcion y desigualdad creciente.

Statuut y Rijkswetten ta brinda, segun AIV, suficiente posibilidad y instrumento pa un cooperacion di seguridad efectivo. Conseho di Minister di Reino mester tin si prome, un vision di Reino riba e tereno di mantencion di ordo cu ta cumpli cu necesidad di tur pais.

E vision aki mester ta dirigi riba fortificacion di henter e cadena di seguridad, basa riba e aplicacion comun di e leynan di Reino relevante riba tereno di husticia y seguridad. Mester duna prioridad na un actuacion basa informacion y creacion di un team di intervencion multidisciplinario cu ta actua contra criminalidad. AIV ta conseha pa bin cu un iniciativa di un ley di Reino cu ta percura pa garantianan riba tereno di mantencion di ordo y derechonan humano. Tambe por mehora lazonan di cooperacion riba tereno internacional. Aki ta menciona e Joint Inter-Agency Task Force South, dirigi pa Merca, e European Intervention Initiative y e Maritime Analysis and Operations Centre- Narcotics, e tratado di San Jose pa combati traficacion di droga den Caribe, y palabracionnan cu paisnan di e comunidad Caribense.