Comision di Mayor di Colegio Arubano (OCCA) a bin cu un peticion pa purba convence Obispado di Willemstad pa nan mantene un representante di mayor den e directiva nobo di Stichting Voortgezet Onderwijs Aruba (SVOA).

Segun OCCA participacion di mayor den nos tempo ta un necesidad si kier realisa un comunidad inclusivo. Nan participacion por yuda mantene espacio di dialogo entre e partnernan cu ta forma e comunidad educativo. Ademas OCCA ta argumenta cu nan participacion den directiva nobo di SVOA ta sigura transparencia riba nivel di maneho di scol.

Obispado y SVOA

Bon Dia Aruba a tuma contacto cu Obispado di Willemstad cu a laga sa cu nan ta laga tur declaracion den man di Sr. Ernesto Rosenstand kende ta presidente actual di SVOA.

Rosenstand a aclaria na e matutino aki cu e no ta representando Obispado, sino cu e ta presidente di e directiva di SVOA cu ta e fundacion cu ta maneha Colegio Arubano.

Encuanto Obispado su rol den e directiva nobo, Rosenstand a declara cu bao statutonan bieu, Obispo tabatin e rol di nombra miembro di hunta directiva, y den statuut nobo e por nombra y kita. Nada mas! “Pero for the rest e directiva ta autonomo.”

El a splica cu antes Obispado por nombra un miembro di e directiva. E comision di mayor por a nombra un representante y ademas tabatin 5 kendenan nan tabata wordo nombra via e sistema di coöptatie. Pero 30 di september nan a cambia esey, y ta asina cu directiva ta manda un carta pa Obispo, ora cu un miembro ta retira, y nan ta propone candidato pa ocupa e vacatura ey. Si obispo ta di acuerdo, e ta firma e proposicion aki.

Den statuto bieu e mayor (OCCA) tabatin representacion. Pero cu e cambio di statuut nan a perde e representacion aki, ya cu nan no a wordo honra mas. Segun Rosenstand, dia 12 di augustus ultimo a pone OCCA na altura cu e cambio di statuut lo implica cu OCCA lo perde su puesto den e directiva.

Motibonan

OCCA a yega di comunica cu nan no a tende te awor, un argumento sano pa exclui e representacion di mayor for di directiva di SVOA, un derecho adkiri desde 2013.

Rosenstand a laga sa cu tin diferente motibo. Un prome motibo ta cu Obispado di Willemstad su deseo ta pa tin uniformidad entre su fundacionnan educativo.

SVOA no ta e unico fundacion educativo di Obispado Willemstad, ya cu nan tin diferente fundacion educativo den e islanan di Reino Hulandes. Na Aruba nan tin por ehempel SVOA, pero Obispado tin SKOA tambe. Riba e tereno aki, Obispado kier bin cu un sorto di uniformidad den e sentido cu ora cu Obispado ta papia cu un di e fundacionnan aki, nan no tin diferente statuut. “Tur fundacion tin mas of menos e mesun statuto nan,” el a bisa.

Rosenstand a laga sa cu e statutonan cu a wordo aproba dia 30 di september ‘no ta ami a trahe ni directiva a trahe.” E statuut aki a wordo tuma for di Rooms Katholiek Centraal School y nan a adapt’e pa Colegio Arubano. Esaki pa cumpli cu e deseo di Obispo pa tur fundacion ta mas of menos mesun cos. E di dos motibo ta algo cu por resulta dificil pa compronde, el a laga sa. E tin di haci cu gobierno ta subsidia scolnan particular of priva, kiermen no publico. Pero scol mester tin un asignatura. Por ehempel Mon Plaisir College tin un asignatura Protestant. SKOA tin un asignatura Catolico y SVOA tin un asignatura Catolico. Gobierno a base di e asignatura ey ta duna na e directiva di nan respectivo fundacion e subsidio pa nan paga salario y otro gastonan. Esey ta nifica –segun presidente di SVOA- cu si Obispo mester a kita asignatura, e subsidio tambe ta cay afo. “E subsidio ta wanta, e ta mara, e ta pega na e asignatura Catolico di scol,” el a bisa.

El a referi cu dia 13 di juli, Obispo a hala e asignatura Catolico di Colegio Arubano aden. E tempo aya e acto aki a trece cun’e cu Colegio Arubano automaticamente a perde su subsidio.

El a trece dilanti cu mirando e situacion cu a surgi, posteriormente e miembronan di e hunta anterior di SVOA bao presidencia di Sr. R. Croes a dicidi nombra, via coöptatie, dos miembro nobo cu tabata trata di su persona (Sr. E.E. Rosenstand) y sacerdote J.F.M. Pilongo pa percura restaura un ambiente di paz y trankilidad den Colegio Arubano. Y despues Sr. Croes a renuncia.

E deal na e momento ey, como punto di salida, tabata cu e directiva tabata bayendo den e direccion cu nan tabatin 5 miembro di e directiva di cual Obispo ta nombra 3 y gobierno ta nombra dos. Den un reunion den seno di directiva di SVOA nan a yega na e conclusion di no duna gobierno y nan respectivo minister di Enseñansa, niun facultad pa nombra nan miembronan den e directiva di SVOA. E motibo tras di e decision aki tabata pa evita cu politica drenta SVOA, Rosenstand a declara na Bon Dia Aruba.

Dor di esey nan a adapta e statuut di Rooms Katholiek Centraal School Bestuur di Corsou, na e situacion local, y nan a pone cu e nombramento y kitamento di e miembronan di e directiva ta bay shen porciento den man di Obispo. Un comunicado cu fecha 6 di october emiti pa SVOA y firma pa su presidente ta splica cu ora a surgi e impasse menciona ariba, e hunta directiva nobo kier a evita un situacion similar previo na e cambio di e hunta mes. P’esey nan a haya inevitabel pa bin cu amienda den e statuut na fabor di autoridad di Obispo. Ta asina cu e hunta a dicidi pa unanimidad pa bin cu cambio den nan statuut.

 

Dicon?

Un pregunta cu ta keda na laira ta: Dicon no tin representacion di e mayornan den e directiva di SVOA? Rosenstand a bisa cu esaki ta un acuerdo cu a wordo acorda entre Obispo y Minister. “Nos a gewoon ehecuta e acuerdo ey!”, el a declara.

Rosenstand a reitera cu den statuut anterior y esun actual Obispo gewoon tabatin dos derecho, esta e derecho di nombra y e derecho di kita. Unabes cu e vacatura ta wordo yena e rol di Obispo a caba.

Ademas esun cu a wordo nombra den e directiva di SVOA su responsabilidad no tin di haci cu Obispo sino cu Colegio Arubano. Kende por honra e peticion di e mayor (OCCA) pa tin un representante den e directiva? El a laga sa cu unabes cu e statuut a wordo cambia, ya no tin mas representacion. Rosenstand a agrega cu na Aruba, Colegio Arubano tabata e unico cu tabatin representacion di e mayor. Mientras cu SKOA no tin’e y eventualmente tampoco den otro fundacion educativo local, no tin’e. Tampoco na Corsou no tin’e. Katholiek Centraal School Bestuur no tin representacion di mayornan, asina el a aclaria e punto aki.

Representacion

E ta consciente cu tin hendenan cu ta critica cu no ta duna representacion na e mayor di Colegio Arubano. Rosenstand ta haya cu si e mayornan kier tin un bos den e directiva, nan por haci’e di diferente manera, entre otro pa medio di acudi na e Rector pa vocifera cualkier preocupacion. E no ta wak ki balor agrega un representacion asina ta trece pa scol, mientras cu nan por haci’e via e canal di e rector di e institucion educativo aki.

“Esey ta loke statuut nobo ta bisa,” el a expresa. Kiermen mester tin un director y den caso aki Rector di Colegio Arubano ta e director. “Cerca dje bo tin cu bati na porta,” el a bisa.

A pesar di e situacion cu a surgi, Rosenstand a agrega cu recientemente el a papia cu Sra. Tamara Croes. Den nan combersacion Rosenstand a splik’e cu e hecho cu nan no ta den e directiva mas, no ta implica cu nan no tin bos mas. “Solamente no den e directiva sino cerca rectorado,” el a bisa.

Presidente di SVOA a bisa cu a keda institui tambe un ‘Medezeggenschap raad’ cu ta consisti di representante di e mayor, e rectorado, e leerlingen raad y un delegacion di e docentenan. Den e organo aki nan por papia cu otro y yega na cierto conclusionnan y manda nan pa hunta directiva di SVOA.

Rosenstand a haya cu nan combersacion a bay bon, y Sra. Croes por a compronde su palabra, aunke e no tabata di acuerdo cun’e. Logicamente e no sa kico lo ta e decision di e mayor (OCCA) y tampoco no ta wordo descarta un caso den corte. E no kier a specula riba e punto aki, ya cu si e situacion aki ta bay corte ta hues esun cu ta bay dicidi. E mes como hurista tin su opinion, pero “mi no ta haya mi mes yama pa ventila esey aworaki, ” el a bisa na e matutino aki.