(NLTimes) – Hulanda ta un di e tiki paisnan cu a implementa practicamente tur medida pa yuda reduci e demanda pa tabaco, un hecho reconoci como “un logro significante” pa World Health Organization (WHO) den un reportahe nobo.
WHO a felicita Hulanda, conhuntamente cu Mauritius, pa uni na e grupo selecto di paisnan cu ta dilanti den e control di tabaco. Desde aña 2016 averahe di persona cu ta huma a consistentemente keda disminui na Hulanda.
Gabinetenan na Hulanda ya caba a implementa varios media pa desencurasha humamento. Esaki ta for di impone prohibicion di huma den barnan y restaurantnan, prohibi huma riba plataforma di trein y den edificionan publico te na impone cu e paketenan pa sigaria no mag di ta atractivo. Supermercadonan na Hulanda a ricibi ordo aña pasa di stop di publicamente ilustra tur e productonan di tabaco. Tambe cuminsando for di aña 2024, e supermercadonan no lo ser permiti bende ningun producto di humamento. Gobierno Hulandes tambe tin plan di sigui corta e cantidad di tienda cu por bende sigaria y e cantidad di luganan unda humamento ta permiti.
Paisnan cu politicanan contra humamento estricto comparabel cu Hulanda ta Brazil y Turkia, WHO a nota den su reportahe. Un cantidad di 8 pais adicional ta hopi probabel di uni e lista aki pronto. E porcentahe di humamento mundialmente a cay for di 22.8 porciento na aña 2007 te na 17 porciento den aña 2021. Na Hulanda, segun Trimbos Institute, e tasa a disminui di 25.7 porciento den aña 2014 te na 18.9 porciento den e aña pasa.
WHO su reportahe a evalua e politica di humamento di paisnan den henter mundo. E organisacion a mantene su posicion critico riba e industria di tabaco, cual el a acusa pa purba di “kita e balor di medidanan proponi pa WHO den tur sorto di manera.” WHO a enfatisa cu malesanan relaciona cu humamento, incluyendo malesanan den pulmon, cardiovascular y varios tipo di cancer ta resulta den 8 miyon morto pa aña. Consecuentemente, humamento y exposicion na huma por significantemente impacta e gastonan di cuido di salud.
