December 15 di e aña aki ta un dia decisivo pa empleadonan publico. E plannan di ahuste di condicion laboral mester ta conoci pa e fecha ey, cu e meta pa cuminza baha gasto publico. Esaki ta poni den e di tres agenda di ehecucion di e landspakket pa Aruba cu a keda cla y ta firma pa Secretario di Estado pa Asuntonan di Reino, Raymond Knops y Prome Minister Evelyn Wever Croes.

E agenda ta delinea palabracionnan cu ainda mester keda concretisa y condicionnan nobo cu mester haya nan forma den e di tres kwartaal di 2021.

E agenda ta reparti den e areanan cu mester reforma esta Finanzas, Impuesto, Economia, Costo y Sector Publico, Salud, Sector Financiero, y Enseñansa.

Control di gasto publico

Meta pa maneha, y pone na ordo e maneho y supervision financiero ta pa Gobierno ta den control. Como tal den e proximo tres lunanan mester investiga con pa fortifica e funcion di cumpra servicio y producto, pa asina haci esaki efectivo y eficiente. Lo mester evalua centralisacion. E investigacion lo produci sugerencia, a base di cua lo tuma decision pa fin di October. E agenda di ehecucion ta tene cuenta cu e proceso di formacion di Gobierno lo por tuma su tempo.

Costo y efectividad sector publico

Meta di e reforma aki ta pa hisa efectividad di e sector publico pa medio di reduci e peso financiero total di e aparato na nivel di e promedio den Caribe, cu ta 10 porciento di e Producto Interno Bruto y reduccion di costo di sector publico den sentido general. Ademas e meta ta pa hisa calidad y efectividad, incluso poder di implementacion di e sector.

Den e siguiente lunanan lo investiga a condicionnan laboral primario, secundario y tercero, entre otro e pago di overtime, areglo di vakantie y otro dianan liber, bonus special y ‘toeslagen,’ como tambe biahamento y pago di dia ora di biaha. Lo introduci proposicionnan pa reduccion di gasto pa tur e aspectonan aki y nan lo keda implementa tambe. E reportahe di investigacion lo ta cla pa 1 di October. Lo haci investigacion comparativo na e leynan pa loke ta e salarionan mas halto na Corsou, St. Maarten y Aruba, unda lo analisa entre otro e elementonan basico, e expansion, e parti di pensioen y e periodo di transicion. E investigacion mes lo mester keda entrega pa fin di e periodo aki, esta na October pero e siguiente pasonan ta pasa pa e siguiente agenda di ehecucion.

LMA lo mester cambia

Tambe lo investiga e formacion, ocupacion y presencia real y empleabilidad di tur trahado di Gobierno y organisacionnan publico, den cuadro di un esfuerso optimal di e personal,Si e trahadonan ta ricibi salario di forma inhusto, lo tuma medida dependiente e situacion of lo por tuma medida, manera para salario of pasa pa retiro. Parti di e proceso aki ta investigacion di e cuadro huridico y adaptacion di e LMA y otro articulonan cu mester ta cla pa yuda den e fluho di trahadonan publico. E fecha cu esaki mester ta cla pa ehecuta ta 15 di December 2021, y ta den man di Hulanda y Aruba.

Revision di Departamento di Recurso Humano

Den e mesun rosea lo revisa e funcion di recurso humano, cu ta encera maneho, conseho, administracion y instrumento pa asina yega na proposicionnan pa mehoracion y nan implementacion. E investigacion lo inicia dia 1 di September, cu ta un retraso pa motibo di proceduranan vigente na Hulanda. E rapport mes lo mester ta cla pa 15 di Februari 2022 y Hulanda y Aruba lo ta encarga cu implementacion. Tambe lo desaroya un maneho strategico di personal, cu ta encera planificacion strategico di persona, basa riba e resultado di e investigacion cu ta bay inicia awor, ehecucion di un sistema di maneho di prestacion denter di e aparato publico, limitacion di influencia politico riba asuntonan di personal. E analisis con pa modernisa e maneho strategico di persona lo mester desemboca den un plan concreto cu ta inclui tambe un maneho con trahadonan publico lo por crece den nan carera. E maneho di prestacion mester ta implementa pa 1 di October 2021, y tur su cuadro legal mester ta cla pa 1 di Januari 2022.

Gasto di huur

Den e tres lunanan aki lo desaroya un plan pa baha y controla gasto di huur, y lo inventarisa e cantidad di huur externo. E plan aki lo mester ta cla pa 25 di Augustus.

Basa riba investigacion existente of adicional, lo haya bista cla riba e necesidad y costo pa ubica oficinanan di Gobierno, y tambe haya e posibilidadnan con pa baha gasto. E meta ta pa yega na un reduccion di 20 porciento di gasto den cinco aña, basa riba presupuesto di 2020. E reduccion aki mester aparece den presupuesto di 2025. Elaboracion riba e punto aki ta pasa pa e siguiente agenda di ehecucion.

Digitalisacion

Prome Minister Evelyn Wever Croes a papia hopi di su plannan pa digitalisacion y den e agenda di ehecucion lo haci un investigacion con e digitalisacion aki mester haya su forma pa yega na un Gobierno eficiente, cu ta inclui servicio digital. Lo bin cu proposicionnan y implementacion a base di investigacion. Diferente departamento publico ta riba lista pa entrante prome di Juli cay bou di e proceso di digitalisacion cu ta inclui esnan cu ta otorga permisonan. E otro servicionan importante lo mester ta conecta pa 1 di Januari 2022.

.