(nih.gov) – Humamento frecuente di cannabis por aumenta significantemente e riesgo di un persona pa haya atake di curason y cerebral (stroke), segun un estudio di observacion cu sosten di Institutonan Nacional di Salud (NIH pa su siglanan na Ingles) di Merca.

E estudio, publica den e Journal of the American Heart Association, ta usa data di casi 435mil adulto Mericano, y ta entre e estudionan mas grandi cu ta explora e relacion entre cannabis y eventonan cardiovascular.

E estudio, financia pa Instituto Nacional di Curason, Pulmon y Sanger (NHLBI) di Merca, parti di NIH, a haya cu uso diario di cannabis – predominantemente door di huma – tabata asocia cu un aumento di 25% den e probabilidad di haya un atake di curason, y un aumento di 42% den probabilidad di atake cerebral, compara cu esnan cu no ta usa e droga. Uso menos frecuente tambe tabata asocia cu aumento den riesgo di eventonan cardiovascular. Usuarionan semanal a mustra un aumento di 3% den probabilidad di un atake di curason y 5% den probabilidad di atake cerebral.

Alrededor di 75% di participantenan den e estudio a reporta cu nan tabata usa cannabis principalmente door di huma e droga. Aproximadamente 25% di e participantenan a reporta usa cannabis mediante otro metodo cu huma, manera vaping, bebe of come e droga.

“Nos sa cu toxina ta keda libera ora ta kima cannabis, similar na esnan haya den huma di tabaco,” segun autor corespondiente Abra Jeffers, Ph.D., un analista di data na Massachusetts General Hospital na Boston y anteriormente un investigador na e Centro pa Investigacion di Control y Educacion di Tabaco na Universidad di California, San Francisco, unda el a conduci e estudio como parti di su trabao post-doctoral.

“Nos sa pa hopi tempo cu huma tabaco ta vincula na malesa cardiaco, y e estudio aki ta evidencia cu huma cannabis ta parce di tambe ta un factor di riesgo pa malesa cardiovascular, cual ta e causa lider di morto na Merca,” Jeffers a bisa. “Uso di cannabis por ta un fuente importante, subestima di malesa cardiaco.”

E investigadornan ta nota cu mientras e mecanismonan exacto vinculando cannabis cu malesa di curason no ta cla y no tabata explora den e estudio actual, varios factor por hunga un rol. Ademas di toxina, receptornan di endocannabinoid – e parti di celnan responsable pa reconoce e tetrahydrocannabinol (THC), e ingrediente psicoactivo principal den cannabis – ta ampliamente extendi den e tehido cardiovascular di e curpa y por facilita riesgo cardiaco.

Consumo di cannabis a aumenta significantemente den ultimo 20 aña na Merca mientras percepcionnan negativo di su uso a reduci, segun encuestanan di gobierno riba uso di droga y salud. Na Merca, cannabis awo ta legal na 38 estado pa uso medicinal y 24 estado pa uso recreacional. Algun estudio a vincula su uso regular na deterioro den desaroyo cerebral y daño na pulmon, como tambe cierto malesa cardiovascular. Sinembargo, tin gap di conocemento tocante e efecto adverso di cannabis riba curason.

Pa investiga mas di cerca e asociacion entre uso di cannabis y salud, Jeffers y su team di investigacion a usa data di 2016-2020 for di e Behavioral Risk Factor Surveillance Survey di CDC. E encuesta cross-sectional anual di CDC a inclui 434,104 adulto di 18 pa 74 aña di edad na Merca y dos teritorio. Mayoria di e encuestado tabata hende blanco (60%), cu 12% hende color scur, 19% Hispano y 9% di otro rasa of etnicidad.

E investigadornan a evalua e asociacion di humamento di cannabis (e cantidad di dia cu e participantenan a bisa nan a huma e droga den ultimo 30 dia) cu resultadonan cardiovascular auto-reporta, incluyendo malesa coronario, atake di curason, atake cerebral y un medida componi di tur tres. Nan a ahusta pa e uso di tabaco y otro caracteristica di e participantenan, incluyendo edad, sexo, rasa, BMI, obesidad, diabetes, nivel di actividad fisico y status economico.

“Esaki ta un hallazgo importante di salubridad publico, particularmente mirando nos esfuersonan andando pa reduci e peso di malesa cardiaco na e pais aki,” segun David C. Goff, M.D. Ph.D., director di e Division di Ciencia Cardiovascular di NHLBI.

“Puntra pashent tocante nan uso di cannabis durante examen medico rutiario den e mesun manera cu ta puntra tocante uso di tabaco por yuda nos haya sa mas di e efecto a largo plaso di marihuana den curpa,” Jeffers a bisa.