(NLTimes)—Desde ayera, aproximadamente 2,540 nacionalnan tercer-pais for di Ucrania no tin derecho mas pa busca refugio den Hulanda. Nan mester aplica pa asilo of un otro forma di residencia of sali for di e pais.
Nacionalnan tercer-pais ta hende cu a biba na Ucrania cu un permiso di residencia temporario ora e guera a cuminsa. Pensa riba studiante, expatriadonan, of trahadonan migrante. Inicialmente nan a cay bao di e mesun proteccion temporario cu refugiadonan Ucraniano, cual ta nifica cu nan no mester a aplica pa asilo, tabatin derecho pa refugio y por a traha den Hulanda.
Eventualmente gobierno a dicidi pa cambia e politica ey. El a argumenta cu e entrada di refugiadonan for di Ucrania tabata demasiado halto pa por laga tur hende aden, y hopi nacionalnan tercer-pais por regresa nan pais siguramente.
Hulanda a plania di trece un fin na e proteccion pa nacionalnan tercer-pais dia 4 di september aña pasa, pero e fecha a ser cambia varios biaha ora hendenan afecta a bay en contra di e decision den cortenan, resultando den veredictonan contradictorio. Na januari, Raad van State a dicidi cu e proteccion por caba dia 4 di maart, ora e acuerdonan Europeo relatando na proteccion pa e grupo ey vence.
Rond di 2,540 nacionalnan tercer-pais for di Ucrania ta biba na Hulanda actualmente, segun NU.nl. Nan tin 28 dia cuminsando ayera pa sali for di e pais of aplica pa asilo of un otro tipo di residencia. E Ministerio di Husticia y Seguridad tin rond di 700 aplicacion pa asilo habri y 120 aplicacion pa residencia pa studia of traha den e pais for di grupo aki. Kico e otronan lo haci ainda no ta claro.
