Pronto Aruba lo conoce un ley nobo cu lo prohibi humamento den luga publico por completo. Manera nos matutino ya caba a informa parlamento a aproba e ley aki pero falta algun trabou prome cu esaki bin totalmente na vigor. Segun minister di Salud, na Aruba den porcentahe no tin hopi humamento compara cu paisnan manera Hulanda of Spaña. Sin embargo e ta bisa cu e ley ta keda importante pa implementa na nos pais.

A pasa varios ley durante e ultimo añanan aki pero un di e leynan hopi importante sigur pa ministerio di Salud ta e ley pa protege ciudadano contra humamento, segun su minister Alex Schwengle (AVP). “Na Aruba ta maximo 20% di hende homber y rond di 10% di hende muhe ta huma. Toch ta mucho hopi ami ta haya.” E ta compronde cu humamento ta algo peligroso, trece malesa, kita bida y trece hopi sufrimento. “Y e no ta necesario, no tin mester di dje.” Pues pa e motibo aki ta sumamente importante pa protege un y tur, specialmente esunnan cu no ta huma, e ta haya.

Preparacionnan lento
Manera cu Bon Dia Aruba a trece pa dilanti den algun publicacion anterior, ta casi tres aña caba cu e tema aki a bin na mesa pero no tin ningun legislacion oficial ainda. E ley ‘Landsverordening beperking tabaksproducten’ ta hinca den un manera cu e ta biniendo na vigor paso pa paso segun iniciado, e parlamentario Marlon Sneek (AVP). Bon Dia Aruba a puntra minister Schwengle tocante e preparacionnan pa e ley aki y pakico ta tarda asina hopi cual el a contesta cu: “Preparacionnan ta andando pero bayendo slow door cu nos ta awo riba e proceso di reenforsa Departamento di Salud. Entre otro cu un director nobo pero cu un functiehuis (organisacion, red.) completamente nobo hunto cu e inspeccion nobo cu a lanta.”

Esey segun e mandatario ta haci cu algun trabou tin retraso aworaki: specialmente den departamento huridico. “Nos ta canando un tiki atras riba schema pa traha tur e otro maneho adicional pa por ehecuta e ley aki.” Na momento cu e departamento ta ‘riba su pia’ cu suficiente personal, e mandatario ta bisa cu e ta kere den e aña ki nan mester por caba cu e ultimo trabaonan pa ehecuta e ley no mas tarda cu 2018.

Preocupacion di casino y hotel
Minister Schwengle ta na altura di e preocupacionnan cu algun hotel y casino tin en cuanto ta e cambio di ley aki cu segun nan lo trece consecuencianan financiero pasobra lo spanta cliente. “Den mi concepto e no ta un preocupacion valido y ami nunca lo kies placa riba salud di nos hendenan. Nan tin espacio y tempo suficiente pa bay adapta nan negoshi pa por cumpli cu ne. Mi ta kere nan mester ta poco creativo tambe pa wak con nan ta bay incorpora sinembargo esunnan cu realmente kier huma.” E asociacion di casino por ehempel ta comparti e preocupacion aki pero nan no ta contra e ley.

Control
Un otro aspecto cu ta falta ainda ta di ken ta bay controla y a base di kico ta bay controla. Esakinan ta aspectonan stipula den ley pero mester concretisa den maneho adicional, e mandatario ta splica. “Esey mester ta cla na e veld pa nan sa kico nan mester controla pa asina nan prepara pa esey. E miho instancia primordialmente pa controla ta polis pero nan no necesariamente mester haci esaki nan so.” Minister Schwengle ta splica Bon Dia Aruba cu mescos e control den restaurantnan unda tin biaha ta haci e hunto cu departamento di Higiena. Cierto cosnan polis por controla, pero tin cierto aspectonan cu nan no tin expertisio pa controla.

Esaki segun e minister ta pakico tin biaha mester combina e departamentonan. E mandatario ta elabora: “E departamento di Higiena ta controla parti higienico, polis ta controla aspecto di ordo publico y si tin tur papel legal. Pues den e caso di humamento kisas esaki lo ta un joint venture entre polis y departamento di Salud.”

Problema pa esunnan na banda
Pa conclui, en cuanto e problema di humamento na Aruba, e mandatario ta splica Bon Dia Aruba cu ta depende bo perspectiva. “Si ta compara bo mes cu otro paisnan internacional, Aruba no tin un problema hopi grandi di humamento pero sin embargo tin hende ta huma. Pa mi, un hende so cu ta huma ta dimas. Laat of trempan humamento ta causa daño anto di diferente forma. E no ta duna cancer so, e ta duna problema cardiovascular, causa daño na hende na estado y hopi mas. E cos di mas tristo tambe ta cu no solamente esun cu ta huma ta e problema. Pero esun cu ta banda di dje cu ta tuma tur e huma tambe su salud y bida ta core peliger. Pues pa mi si ta 10 of 20% so ta huma, ta gewoon 10 of 20% dimas.”