IBISA a anuncia nan di 42 edicion di Turibana Walk & Run

Ayera mainta durante un conferencia na IBISA, William Erasmus, hefe di Departamento di Desaroyo, hunto cu Rafael Perez, coordinador di Deporte Escolar y Recreacion, a duna informacion tocante e di 42 edicion di Turibana Walk & Run cu lo tuma luga diadomingo 11 di september 2022.

Manera ta custumber e caminata lo tuma den bario di Noord. E caminata lo cuminsa pa 6or di mainta y lo ta saliendo for di oficina di MFA Noord. Cuponan pa e caminata ta limita, lo tin un maximo di 1000 cupo tambe lo tin un tempo maximo di dos ora pa completa e caminata. Esaki ta conta tanto pa coredo como esnan cu lo ta canando.

Erasmus a splica cu lo tin diferente categoria pa e walk and run aki. Lo tin e individual run cu ta un distancia di 10.5 km tanto pa coredo como pa esnan cu ta cana. Lo tin e open duo relay, cu ta consisti di un team di dos participante na unda cada participante lo core mita di e distancia cu lo bira 5.25 km.

Lo bay tin tambe e categoria di corporate relay un biaha mas, cu IBISA a introduci durante nan half marathon y lo introduci e categoria aki den e Turibana Walk and Run. E categoria aki ta pa hendenan cu ta traha den e mesun compania of organisacion.

Erasmus a enfatisa cu cada participante di e team den e categoria corporate relay mester demostra cu nan ta traha na e mesun compania of organisacion. Si e integrantenan di e team no ta traha na e mesun compania of organisacion, nan no or participa den e categoria corporate relay. E categoria aki tin e mesun proceso cu e open duo relay, caminda cada coredo ta core mita di e distancia, 5.25 km.

Un categoria nobo cu IBISA ta introduciendo pa e caminata aki ta e running club duo challenge. Esaki ta specificamente pa e ekiponan di coremento di Aruba por participa. Esaki ta pa teamnan, duo di dos persona, femenino of masculino. Pa e categoria aki e teamnan no por ta mix. Den e categoria aki ambos coredo ta core e distancia di 10.5 km hunto y na final nan tempo lo wordo conta hunto.

Cada club di coredo por registra un team di cada sexo solamente. Esaki Erasmus a indica ta pa mantene balans ya cu e cuponan ta limita y asina tambe nan ta brinda mas oportunidad den e otro categorianan pa mas hende por gana, y alabes nan ta promoviendo mas movecion y participacion den e careda aki.

Pa loke ta trata registracion, Erasmus a remarca cu participantenan cu completa nan pre-registracion no kiermen cu nan cupo ta confirma pa e careda. Na momento cu e pago wordo realisa, e ora e cupo ta sigura. Pre-registracion ta yuda pa proceso di inscripcion ta mas facil.

Erasmus a indica tambe cu pa e careda aki lo tin un early bird special. Entre mei 31 y juni 10 e prijs pa careda general lo ta 35 florin pa persona y pa team lo ta 70 florin. Despues e prijs lo cambia y ta bira 40 florin pa persona individual y 80 florin pa team. Ariba dia 8 y 9 di september e participantenan lo por pasa busca nan pakete di t-shirt y bib cu nan chip pa e careda na oficina di IBISA na Oranjestad.

Erasmus a splica cu pa e categorianan open duo y corporate relay, e team lo haya un solo bip y esaki e di dos coredo lo bisti. E prome coredo cu lo ta saliendo for di inicio lo ricibi un ankle bracelet pa asina nan haci e careda. Na momento cu e prome coredo yega na e stacion di relay e mester kita e ankle bracelet y pas’e pa e di dos coredo por bisti esaki y termina e careda.

Na final e coredo cu tin cu kita e bracelet y entrega esaki na un miembro di IBISA pa asina por skirbi skirbi e tempo di e careda. Erasmus remarca cu ta pidi e participantenan den e categoria di team pa t’ey presente 5:30 di mainta pa haci nan check-in y pa e di dos coredo por tuma un bus pa yega na e stacion di relay. Na e stacion di relay lo tin un bus tambe pa e prome coredonan por yega e final di e careda.

E aña aki pa prome biaha lo tin un premio cash pa e overall winner femenino y masculino di e careda individual, e cifra di e premio lo wordo anuncia despues, y tambe lo tin un premio di rifa pa tur persona cu inscribi pa cana den e Turibana Walk and Run.

Erasmus a recorda cu durante nan ultimo careda nan a duna voucher. Si en caso un persona kier haci uso di e voucher aki nan mester pasa na e oficina di IBISA na Oranjetsad cu e pre-registration y na balie lo desconta e voucher for di e prijs di inscripcion di e Turibana Walk & Run.

Perez a elabora ariba algun regla y tips cu e participantenan mester tene cuenta cune pa e caminata. Pa seguridad di e coredonan el a recorda cu tur participante mester mantene nan mes, aunke tin permiso, na banda drechi di e caminda pa motibo cu tin chens cu trafico lo keda core na algun caminda.

No ta permiti pa tercera persona compaña e coredo. Ultimo tempo por tuma nota cu algun persona ta wordo compaña cu otro hende riba bais y esey e biaha aki no ta permiti mas. Tampoco ta permiti pa tercera persona, cu no ta personanan na water post of personal di IBISA, asisti e persona cu awa of cualkier otro likido. Esey no ta permiti y e coredo por wordo descualifica pa esaki.

Pa loke ta trata e categoria e individual, Perez a splica cu e edad ta cuminsa na 17 aña y e categorianan ta 17 pa 19 aña, 20-29 aña, 30-34 aña, 35-39 aña, 40-44 aña, 45-49 aña, 50-54 aña, 55-59 aña y ultimo categoria ta 60+.

Pa loke ta e open relay e edad minimo ta 14 aña y e categoria aki e team por ta femenino of masculino of mix. Pa e categoria aki lo permiti un maximo di 70 team pa inscribi.

Categoria corporate realy e edad minimo ta 17 aña, femenino y masculino of mix y e cantidad maximo di team cu por inscribi ta 50 team. Perez a enfatisa cu cada miembro di e team mester demostra cu ta traha na e mesun compania, si tur dos coredo no ta traha na e mesun compania no por core cu otro den e categoria aki.

Pa e categoria nobo di running club duo challenge, tur dos coredo di e team mester ta masculino of femenino, no ta permiti team mix. Pa e categoria aki e cantidad maximo di team cu por registra ta 40, 20 team femenino y 20 team masculino. Ta remarca cu cada team mester apunta un capitan y esaki ta conta pa tur e teamnan cu ta bay participa.