Ayera 31 di mei tabata Dia Mundial di Bisa No Na Tabaco unda cu Fundacion Anti Droga Aruba (FADA) a realisa un conferencia di prensa pa asina ey comunidad para keto y pone enfasis riba e topico importante aki pa proteccion di naturalesa y di ser humano.

Impacto dañino di industria di tabaco riba medio ambiente ta hopi grandi y ta sigui crece, loke ta agrega un presion innecesario riba recursonan y ecosistema fragil di nos planeta.

Tabaco ta mata mas di 8 miyon persona cada aña y ta destrui medio ambiente, loke ta daña mas ainda ta e salud humano, a traves di e cultivo, produccion, distribucion, consumo y su desperdicionan posterior na e consumo.

FADA como un fundacion enfoca riba prevencion ta recorda e dia aki y a trece dilanti kico tur ta e peligernan na momento cu un persona ta bay usa un producto di tabaco, segun Rulienne Arends trahado preventivo di e fundacion a indica cu pa hopi biaha e muchanan di scol tin hopi pregunta pa e topico aki mirando cu rond di nan sea un mayor of un otro familiar ta huma por ehemplo, un sigaria.

Un di e preguntanan ta: Si ta Ok pa mami of papi huma? E no ta haci nan daño? Y ta eynan unda nan ta para keto un rato pa informa comunidad riba tur e partinan cu ta di peliger, no solamente pa esun cu ta huma sino tambe pa esunnan cu ta rond di dje.

Tur aña FADA ta bishita hopi scol unda cu nan ta duna charla pa papia specialmente di e topico di humamento y cu varios herment nan ta splica e muchanan di un manera dinamico e consecuencianan di humamento y con e pulmonnan ta bira preto pa via di e kimico cu sigaria tin den dje.

“Unabes bo ta huma e tar aki, e ta pasa via bo boca, bay bo garganta, ta yega na pulmon y tiki tiki e cuminsa pega na e murayanan riba pulmon, cu e tempo e pulmon ta bira preto”, Arends a señala.

Cu e dinamica, Arends ta splica cu visualmente e muchanan por wak un tiki mas di cerca e peliger di loke sigaria ta haci, sin lubida cu tin un kimico hopi adictivo cu ta yama Nicotina e cual ta pone e persona pa bira adicto na sigaria, cu ta wordo poni tambe riba e paki cu e hendenan ta cumpra.

Pa e motibo aki, ta importante pa mayornan y docentenan di scol papia cu muchanan y hobennan kico ta e peliger na momento di tuma e decision di huma sigaria.

Tambe, tin esunnan cu ta denomina ‘Seconhand smoke’ of humado pasivo, esnan cu no ta huma pero rond di nan tin un persona cu ta haci uso di sigaria y cu nan tambe ta core e mesun peliger cu un persona cu ta huma, nan ta inhala e huma y tambe por causel’e daño na su salud.

Algo cu nan tambe ta pone un tiki enfasis riba dje ta e sigaria “BlackStone” un producto cu ta parce un mini siga y cu cualkier persona por hay’e den cualkier supermercado cu diferente sabor pero tambe ta contene nicotina, awendia ta hopi facil pa e hobennan yega y cumpra esaki sin cu nan mayor por ta na haltura di esey, caminda tampoco por laga afo e mesun siga cu no ta hopi usa pa hobennan pero cu tambe ta pertenece na e famia aki.

Arends a declara cu FADA ta hopi contento cu na comienso di luna di mei a bin cambio den leynan pa loke ta trata e parti di humamento di sigaria unda cu den un auto cu ta transporta un mucha no ta permiti pa huma sigaria y tambe a aplica otro tipo di restriccionnan pa cu esaki.

Di su parti, Amyma Kelly cu tambe ta trahado preventivo di e fundacion a trece dilanti e topico cu a bira un tendencia entre muchanan y hobennan yama “Vaping” unda tambe nan ta hayando yamada pa via di esaki.

Vaping a wordo introduci na mercado pa personanan cu tin un adiccion pa cu sigaria y asina nan por disminui e consumo di sigaria, pero na henter mundo y na Aruba tambe e hobennan a cuminsa haci uso di dje sin sa e consecuencianan tras di esaki, vaping tambe contene e kimico nicotina y un bes cu e persona ta haci uso di dje e ta bay permanece.

Vaping tambe ta causa cancer di pulmon, iritacion di garganta entre otro caminda cu vaping ta wordo representa di diferente forma, el a cuminsa na forma di un pen y awor el a bira mas grandi cu diferente sabor unda cu e mayoria di nan ta contene nicotina.

Tin un di nan cu ta parce un memoria USB cu e hobennan ta usando hopi manera Kelly a sigura, cu ta wordo representa den diferente forma, color y largura “ta hopi importante pa mayornan pone un tiki mas atencion riba esaki pasobra muchanan por carg’e den nan saco di carson of den nan tas, tambe nan ta hib’e na scolnan sin cu docentenan sa”, el a bisa.

Loke nan como FADA a bin ripara den transcurso di tempo ta cu e tendencia den hobennan y muchanan aworaki ta vaping cu ta wordo usa hopi, esey ta pa motibo cu nan ta kere cu “e ta djis un sabor di strawberry y no ta haci mi un daño, segun nan mente e ta mas miho cu si bo ta bay huma un sigaria”, Arends a finalisa.

LEAVE A REPLY

Please enter your comment!
Please enter your name here