(AP) – Productor di video game Rockstar Games a publica riba dialuna cu imagennan di e desaroyo pa e siguiente version di nan wega popular Grand Theft Auto a ser horta.
Un persona cu aparentemente ta e hacker en cuestion, publicando riba Telegram, a pone 90 video di e robo aki online riba diadomingo, y a bisa cu e tin e codigo di e fuente, cual e tin intencion di pone na benta pa un prijs minimo di 10,000 dollar.
Associated Press a descarga e contenido y a mira e imagennan di e desaroyo pa asina verifica si e imagennan aki tabata auntentico y en realidad e imagennan di e compania.
Den un declaracion riba Twitter, e compania a bisa cu nan no a anticipa ningun strobacion den e servicionan di nan wega live, ni tampoco impacto riba e proyectonan cu actualmente tin andando. Un vocero pa su compania basa na New York Take-Two Interactive Software Inc., a nenga di contesta pregunta di Associated Press tocante ki ora nan a tuma nota di e invasion aki, y si en realidad e codigo di e fuente a ser horta y si e hacker a purba extorciona e compania.
E hacker a bisa cu e tabata involucra den e hack cu recientemente a tuma luga na Uber, sinembargo no tin evidencia di esaki te ainda.
