(AP) — Fondo Monetario Internacional (IMF) kier pa El Salvador stop di usa e criptomoneda altamente volatil Bitcoin como moneda legal, y regula estrictamente e cartera electronico cu gobierno a pusha pa adopcion na henter e pais.
Hunta di IMF a ‘urgi autoridadnan pa reduci e magnitud di ley di Bitcoin door di elimina status di Bitcoin como moneda legal’, segun IMF a bisa den un declaracion ayera.
“E adopcion di criptomoneda como moneda legal, sinembargo, ta carga riesgonan grandi pa integridad financiero y di mercado, stabilidad financiero y proteccion di consumidor”, declaracion di IMF ta bisa.
Presidente Salvadoreño, Nayib Bukele a lidera e empuhe pa adopta Bitcoin como moneda legal hunto cu e dollar Mericano. Asamblea Legislativo di El Salvador a haci e pais e prome pa haci esaki na juni ultimo.
Despues di casi duplica den balor pa fin di aña psa, Bitcoin a cay, y ayera tabata tiki mas abao cu unda e tabata na momento cu Congreso a vota dia 9 di juni. E ley di Bitcoin a drenta na vigor na september.
For di comienso tabatin preocupacion cu un moneda digital crea fuera di e control di gobiernonan lo atrae actividad criminal. Bukele a promove e adopcion como un forma pa miles di Salvadoreñonan evadi tarifanan di transferencia di placa na momento cu familiarnan bibando den exterior ta manda nan remesa.
Ley di El Salvador a haci un yamado pa tur negoshi – cu e habilidad tecnologico – acepta Bitcoin como pago. E lansamento tabatin dificultad, pero ta parce di a mehora.
Bukele a bira e faborito di promotornan di criptomoneda, y desde e tempo ey a papia di construi un ciudad Bitcoin y emiti bononan cu sosten di Bitcoin, algo otro riba cual directornan di IMF a expresa preocupacion.
Oficina di Bukele a bisa cu no tabatin comentario inmediato riba declaracion di IMF.
Minister di Tesoro di El Salvador, Alejandro Zelaya, sinembargo, a nota cu IMF tabata di acuerdo cu reforsa inclusion financiero tabata importante y cu un cartera electronico por yuda, na loke el a agrega via Twitter: “Ta parce di traha pa inclusion financiero, pero bo no mester hacie. E futuro no ta warda pa niun hende. #Bitcoin.”
IMF si a elogia gobierno di Bukele riba su maneho di pandemia di Covid-19. E pais actualmente ta experimentando un aumento di infeccion, pero tabata agresivo den vacunacion di e poblacion y a mantene un mortalidad relativamente abao.
Tambe a nota cu economia ta proyecta pa crece 10 porciento na 2021 despues di contrae 7.9 porciento e aña anterior.
E hunta si a mira otro problema den horizonte, sinembargo, si gobierno no controla su gasto. “Deficitnan fiscal persistente y servicio di debe halto ta conduciendo na necesidad halto y aumentando di financiamento”, e declaracion ta bisa. “Bao politicanan actual, ta spera cu e debe publico ta bay aumenta na alrededor di 96 porciento di GDP na 2026 riba un caminda insostenible.”
