Instituto Medico San Nicolas (IMSAN) por lo pronto no ta bay realisa ningun cirugia. E personal cu normalmente ta traha den departamento di operacion ta bay duna sosten na nan coleganan den Hospital Dr. Horacio Oduber, segun informacion di portal noticiero aruba.nu.

Capacidad di cuido na Aruba no por carga cu e cantidad di pashent di coronavirus mas. Ayera tabatin 11 pashent di Covid cu mester a manda hospitalnan na Colombia pa nan por ricibi tratamento den Unidad di Cuido Intensivo (ICU). Tur cuido electivo a stop pa asina por usa e mayor cantidad di personal medico pa cuido di coronavirus.

“Ainda nos no ta tratando cu codigo preto”, segun prome minister demisionario, Evelyn Wever-Croes a bisa weekend ultimo na momento di duna informacion riba situacion di hospital, cu a conduci na introduccion di medidanan adicional. Si yega na tal estado, lo haya cu dokternan mester tuma decision pa no duna tratamento na cierto pashent mas pasobra no tin e posibilidad pa haci esaki.

Directiva di HOH ta frustra pa e comportamento di algun grupo di persona cu, principalmente durante weekend, ta sali y bebe alcohol, ta bringa y causa accidente di trafico. E victimanan ta ricibi asistencia medico, pero hospital no ta sinta warda pa e sorto di incidentenan aki, cu por a evita. HOH lo prefera di usa e camanan pa pashentnan di coronavirus, segun aruba.nu.

Menos persona interna pa Covid den HOH

Mientras tanto, director di HOH, Jacco Vroegop a bisa den un relato den portal noticiero NoticiaCla cu den ultimo 24 ora tabatin menos pashent di Covid-19 interna den hospital.

Den pasado, maske e cifranan tabata ilustra cu tin menos persona interna, esaki no tabata pa motibo cu nan a recupera completamente. Sino cu nan situacion a bira menos grave y a manda nan pa continua recuperando na cas, den algun caso, cu tanki di oxigeno. Tambe e cantidad di pashent den ICU tabata baha no semper pasobra e pashent a recupera, sino tambe pasobra pashent ta fayece. Vroegop no a confirma si esaki ta e caso actualmente tambe.

Pero si Vroegop a comenta cu ta contento cu tin mas ayudo di AMI, e grupo di enfermero specialisa den ICU cu ta na caminda for di Merca. “Esaki lo yuda expande e capacidad di ICU y por duna mas persona e ayudo necesario”, el a bisa NoticiaCla. “Nos ta increiblemente contento cu Hulanda ta sostene nos cu esaki.”

Potret: Ret Karibense.

LEAVE A REPLY

Please enter your comment!
Please enter your name here