Retonan social, emocional y financiero por nifica cu varios studiante ta tuma mas tempo pa caba na estudio na IPA

Studiantenan na Instituto Pedagogico Arubano ta miembronan di un comunidad cu tin hopi problema social. Locual ta mira ta sosode rond di e isla ta refleha tambe memey di e cuerpo estudiantil, cu ta nifica cu docente y futuro docente tin nan propio reto.

Nan ta esnan cu mester bay educa hobennan di Aruba, mientras cu nan mes ta biba den situacionnan social dificil. Asina Director General di IPA drs. Marilyn Richardson a bisa Bon Dia Aruba. E comentario aki a bin despues hasta na nivel di Minister tabatin critica pa e cantidad di aña cu algun studiante ta tuma pa caba nan estudio di maestro.

Ta pa e motibonan aki cu IPA a dicidi , pa algun tempo caba cu mester brinda sosten mental na su studiantenan. “Nos tin cooperacion cu Universidad di Aruba cu yama Shoco Wellness cu ta brindando studiantenan un cuido adicional. Den nos caso, na IPA, nos tin docente cu ta psicologo tambe. Nan ta dos persona cu por ofrece e tipo di guia, dependiendo di e situacion. Of e studiantenan por bay den e Shoco Wellness community unda nan por haya mas ayudo.”

Banda di esey, den e curiculo di IPA ta purba tene cuenta cu aspectonan pa studiantenan haya habilidadnan pa ta mas resiliente. “Tur esaki ta forma parti di e trayecto di studia na IPA,” drs. Marilyn Richardson a bisa. “ Y si e studiantenan acepta e ayudo, nos ta ripara mehoransa den nan resultadonan.”

Di otro banda, Director ‘Estudio Inicial’ Berthson Boekhoudt a enfatisa cu “e persona mester acepta cu e tin un problema si. Tin biaha nos ta acerca nan, pero nan mes ta bisa cu nan no ta mira cu tin un problema. Y eseynan ta caso cu no ta progresa. Mayoria biaha di esnan cu ta atende e programa ta mira progreso.” Director General Marilyn Ricahrdson a bay de acuerdo cu “nan tin cu admiti cu tin algo cu no ta bon, y para habri pa acepta yudansa. Hopi biaha ta net esnan cu ta bisa cu no mester yudansa ta mira e efecto den nan estudio. Esey tambe ta motibo cu nan ta tuma seis aña pa caba nan estudio, en bes di cuater.”

Riba dje tin e problemanan practico, manera problema financiero cu ta pone cu studiantenan mester bay traha, of cuida un mayor. Tur esaki ta contribui cu algun studiante mester interumpi nan estudio.