Tarea pa parlamento aki?

E spanto cu henter Aruba a haya e siman aki cu e incidente fatal dialuna ultimo, claramente ta mustra nos cu tin asunto cu ta merece mas atencion. Na prome luga ta obvio cu tin cosnan cu no a bay bon den e caso aki, den cual tanto un agente policial como un pashent psikiatrico a perde nan bida. Nos no ta kere cu ta prudente pa na e momento aki, mientras cu autoridadnan ta haciendo nan trabao investigativo ainda, pa bay saca conclusion tocante e suceso mes. Sin embargo tin algun elemento conoci caba, cu ta indica den cierto direccion. Un di nan ta cu e presencia policial den e caso aki no tabata na nivel cu tabata necesario. Dos agente policial so, pa atende caso di un persona, cu na mas cu un ocasion a causa problema severo pa cuerpo policial pa su fisico, no ta mustra un decision bon evalua di antemano. Kico tabata e circunstancianan exacto cu a conduci na esaki lo resulta di e investigacion menciona.

E otro aspecto ta e situacion di un pashent psikiatrico cu obviamente tabata den un situacion peligroso, pa su mes y pa otro hende. E pregunta ta surgi, sigur mirando cu esaki no ta un caso unico, con bon nos atencion profesional na e tipo di pashent aki ta. Nos no ta papiando aki di e nivel y calidad di e personal cu ta atende e personanan aki. Nos no tin motibo pa duda di nan capacidad. Pero e preguntanan ta bay den direccion di con bon e structura ta, den termino di por conta cu tur medio cu nan mester pa haci nan trabao, y kico pa haci cu casonan dificil pa cual no tin un solucion permanente. Ta conoci cu na Aruba nos no por maneha tur caso den e ramo aki, y ta haci uzo di facilidad den exterior manera na Curaçao. Esey ta keda semper, manera cu tur otro servicio medico, un asunto di evaluacion constante, kico ta haci den cas y kico ta manda pa exterior. Nos no ta pretende di tin un opinion acerta encuanto esaki, pa por haci esaki bo mester dispone di tur elemento. E ta un asunto di maneho similar na otro servicionan medico, unda hende experimenta mester conseha kico nos ta haci den cas y kico no.

Pero nos tin un pregunta grandi tocante e casonan di pashent cu problema mental cu ta cay, manera ta bisa na Hulandes, ‘tussen de wal en het schip’. Nan ta bira un peligro pa nan alrededor, pasobra ta resulta cu no tin un structura adecua pa preveni e tipo di caso aki, cu no ta haya e cuido cu nan mester. Realmente, cuanto di e casonan aki nos tin? Con urgente e situacion ta? Nos no ta bay saca conclusion pasobra e siman aki riba un dia tabatin dos caso di persona cu a lanta cu nan famia, pero ta importante pa nos tin bista riba e totalidad, pa por formula maneho, planifica y pone e medionan financiero pa atende e asunto aki debidamente.

Y por ta cu aki nos ta bay topa cu e problema cardinal den esaki: placa. Realmente nos ta poniendo e recursonan financiero cu mester pa nos tin servicio adecua pa atende henter e problematica di pashent cu problema mental? Por ta cu e cuido specifico aki ta algo cu nos ta prefera di tene un poco for di luz di dia? Un topico cu talbes nos ta prefera di no toca? Y mientras cu e ta algo cu nos mester enfrenta como fenomeno di tur manera, y nos lo mester pone e recursonan disponibel pa haci loke nos mester haci? Ademas, aki atrobe ta trata di un tema cu ta surpasa limite di maneho di un solo ministerio. E ta toca en todo caso tanto ministerio di Husticia como esun di Salubridad Publico. Pero tambe e ta algo cu ta toca maneho di nos comunidad en general. Esaki ta un di aspectonan unda cu ta midi un comunidad responsabel y civilisa. No tin espacio pa laga hende cu problema (mental) serio cu nan mes no por maneha, anda pariba pabao sin solucion. Y cu consecuencia desastroso ademas.

Pero nos ta kere tambe cu loke a aparece riba nos e siman aki, ta sintoma di un situacion di maneho gubernamental, unda scarsedad di finanza ta cuminsa mustra vulnerabilidad di diferente servicio gubernamental cu no por eherce nan trabao manera mester ta, pa falta di material y personal. No ta straño cu hustamente e siman aki ta tende atrobe di e falta di diferente material y capacidad specialisa den cuerpo policial. Ta dificil pa balora e tipo di critica aki, si e ta bin for di den e cuerpo o no, si e informacion pa haci esaki no t’ey. Ta parce nos cu aki tin tarea pa parlamento, aunke nos sa cu nan lo prefera dedica nan mes na campaña, pa reuni y por fabor sikiera un biaha trata esaki na un manera serio. Lo ta un berguensa cu ta toca nos tur, si e dianan di luto pasa, anto nos no ta mira accion den e asunto aki.